અમરેલીના જસદણ ખાતે આવેલી આલ્ફા નવોદય ટ્રેનિંગ સેન્ટરની હોસ્ટેલમાં અભ્યાસ કરતી 10 વર્ષની માસૂમ બાળકી આયુષી બદલાણીયાના શંકાસ્પદ મોતનો મામલો ગરમાયો છે. આ માસૂમ દીકરીને ન્યાય અપાવવા માટે આહીર સમાજ સહિત સર્વે સમાજના લોકોમાં ભારે રોષ જોવા મળી રહ્યો છે. આયુષીના મોત અંગે તટસ્થ તપાસ માટે મોટી સંખ્યામાં લોકો એકઠા થયા હતા અને હાથમાં "આયુષીને ન્યાય આપો" ના પોસ્ટરો સાથે પ્રાંત કચેરી સુધી રેલી યોજી હતી. આ રેલીમાં વાતાવરણ સૂત્રોચ્ચારોથી ગુંજી ઉઠ્યું હતું અને ત્યારબાદ મામલતદારને ન્યાયની માંગ કરતું આવેદનપત્ર પાઠવવામાં આવ્યું હતું.
ધારાસભ્ય હીરા સોલંકીએ આપ્યો પરિવારને ટેકો
આ ન્યાય યાત્રા અને વિરોધ પ્રદર્શનમાં રાજુલાના સ્થાનિક ધારાસભ્ય હીરા સોલંકી પણ વિશેષ રૂપે જોડાયા હતા. તેમણે પીડિત પરિવાર પ્રત્યે સંવેદના વ્યક્ત કરતા જણાવ્યું હતું કે, "માસૂમ બાળકીના પરિવારજનોને ન્યાય મળે તે માટે હું સંપૂર્ણપણે તેમની સાથે ઊભો છું." રેલીમાં ધારાસભ્ય ઉપરાંત આહીર સમાજના અગ્રણીઓ, સામાજિક કાર્યકર્તાઓ અને મોટી સંખ્યામાં સ્થાનિક નાગરિકો ઉપસ્થિત રહ્યા હતા. આ દુઃખદ ઘટનાને પગલે સમગ્ર રાજુલા શહેરમાં ઘેરો શોક વ્યાપી ગયો છે અને લોકોમાં ન્યાય મેળવવાની તીવ્ર ઈચ્છા દેખાઈ રહી છે.