અમરેલી જિલ્લામાં વાતાવરણમાં આવેલા પલટા બાદ વિવિધ ગ્રામ્ય વિસ્તારોમાં સાર્વત્રિક વરસાદી માહોલ જામ્યો છે. ખાસ કરીને અમરેલી તાલુકાના નાના ભંડારીયા સહિત આસપાસના ગ્રામીણ પંથકમાં મેઘરાજાએ ધમાકેદાર પધરામણી કરીને ધોધમાર વરસાદ વરસાવ્યો છે. કાળાડિબાંગ વાદળોની ઘેરાબંધી વચ્ચે તૂટી પડેલા આ વરસાદથી સમગ્ર ગ્રામીણ વિસ્તાર પાણીપાણી થઈ ગયો હતો.
શેરીઓમાં નદીઓની જેમ પાણી વહેતા થયા
નાના ભંડારીયા ગામે ટૂંકા સમયમાં મુસળધાર વરસાદ ખાબકતાં ગામના મુખ્ય માર્ગો અને શેરીઓમાં પાણી વહી નીકળ્યા હતા. ગામના નીચાણવાળા સોસાયટી વિસ્તારો અને શેરીઓમાં નદીઓની જેમ વરસાદી પાણી વહેતા થવાના દ્રશ્યો સામે આવ્યા હતા. સતત વરસેલા વરસાદથી ગામના સ્થાનિક જળસ્ત્રોતોમાં નવા પાણીની આવક થઈ છે અને વાતાવરણમાં આહલાદક ઠંડક પ્રસરી ગઈ છે.
