એશિયાઈ સિંહોની હોમગ્રાઉન્ડ ગણાતા અમરેલીના ધારી ગીર પંથકમાં વનરાજોનું રાજકીય સામ્રાજ્ય ફરી એકવાર માર્ગો પર જોવા મળ્યું છે. રાત્રિના અંધકારમાં શિકારની શોધમાં નીકળેલા સિંહ પરિવારના બે સભ્યો અચાનક હાઈવે પર આવી ચડતાં વાહનચાલકો અને સ્થાનિકો માટે આકર્ષણનું કેન્દ્ર બન્યા હતા. ગીરનું ઘરેણું ગણાતા સિંહો હવે અવારનવાર ગ્રામીણ વિસ્તારો અને મુખ્ય રસ્તાઓ પર લટાર મારતા નજરે પડી રહ્યા છે.
છતડિયા વાઘાવાડી રોડ પર 2 સિંહોએ મારી લટાર
ધારી તાલુકાના છતડિયા વાઘાવાડી રોડ પરથી રાત્રિના સમયે બે સિંહો બેફિકર બનીને રસ્તો ક્રોસ કરી રહ્યા હતા. ખોરાક અને શિકારની શોધમાં જંગલ વિસ્તારમાંથી બહાર આવેલા આ વનરાજોની જોડી હાઈવે પર રોયલ વોક કરતી જોવા મળી હતી. રસ્તા પરથી પસાર થઈ રહેલા વાહનચાલકોએ આ નયનરમ્ય અને થ્રિલર દ્રશ્યો પોતાના મોબાઈલ કેમેરામાં કેદ કરી લીધા હતા.