અમરેલી જિલ્લાના સાવરકુંડલા પંથકમાંથી તહેવારના માહોલ વચ્ચે એક અત્યંત દુઃખદ અને ચિંતાજનક ઘટના સામે આવી છે. સાવરકુંડલાના ગોંદરા નજીક આવેલા નગરપાલિકાના બંધ પડેલા શાકભાજી માર્કેટમાં અચાનક ભીષણ આગ ફાટી નીકળી હતી. દિવાળીના તહેવાર દરમિયાન ફટાકડાના તણખલાને કારણે આ આગ લાગી હોવાની પ્રબળ આશંકા વ્યક્ત કરવામાં આવી રહી છે. આગની આ વિકરાળતા એટલી બધી હતી કે દૂર-દૂર સુધી ધુમાડાના ગોટેગોટા જોવા મળ્યા હતા.
સમર્પણ ગૌશાળાની ગાયો માટેનો ઘાસચારો સ્વાહા
પ્રાપ્ત વિગતો અનુસાર, આ બંધ પડેલા શાકભાજી માર્કેટના ડેલા કે હોલમાં સમર્પણ ગૌશાળાની ગાયો માટે ખાવા-પીવાની નિરણ એટલે કે ઘાસચારાનો મોટો જથ્થો સંગ્રહ કરીને રાખવામાં આવ્યો હતો. ફટાકડાના કારણે લાગેલી આગે આ ઘાસચારાને પોતાની ઝપેટમાં લઈ લીધો હતો, જેના કારણે ગાયો માટેનો મૂલ્યવાન ઘાસચારો જોતજોતામાં બળીને સંપૂર્ણપણે ખાખ થઈ ગયો હતો. ગૂંગળામણભરી આ સ્થિતિથી જીવદયા પ્રેમીઓમાં પણ ભારે દુઃખની લાગણી ફેલાઈ ગઈ છે.