આણંદ જિલ્લાના ઉમરેઠ પંથકમાં અચાનક વાતાવરણમાં મોટો ફેરફાર જોવા મળ્યો છે. છેલ્લા કેટલાક સમયથી વરસાદે ખેંચાણ આપતાં વિરામ લીધો હતો, તેવામાં આજે અચાનક આકાશમાં કાળાડિબાંગ વાદળો ઘેરાયા હતા. વાતાવરણ બદલાતાં જ ધસમસતા પવન અને કાનફાડ ગાજવીજ સાથે ધોધમાર વરસાદ વરસવાનો શરૂ થયો હતો.
ડાંગરના પાક માટે અમૃત સમાન વરસાદ
ઉમરેઠ અને આસપાસના ગ્રામ્ય વિસ્તારોમાં વરસેલો આ વરસાદ ખાસ કરીને ડાંગરની ખેતી કરતા ખેડૂતો માટે અત્યંત આશીર્વાદરૂપ સાબિત થયો છે. સિંચાઈના પાણીની તાતી જરૂરિયાત સમયે જ પડેલો આ વરસાદ ડાંગરના પાક માટે કુદરતી ખાતર સમાન સાબિત થતાં ધરતીપુત્રોમાં ભારે હરખ અને આનંદની લાગણી છવાઈ ગઈ છે.