આણંદ જિલ્લાના વાસદ ખાતે આવેલા મનોહર ટેકરા વિસ્તારમાં મોડી રાત્રે અસામાજિક તત્વોની ગંભીર કરતૂત સામે આવી છે. ઘરોની બહાર પાર્કિંગમાં મૂકેલા વાહનોને અજાણ્યા શખ્સોએ લક્ષ્ય બનાવીને અચાનક આગ ચાંપી દીધી હતી. આગ લગાડ્યા બાદ આ તત્વો અંધારાનો લાભ ઉઠાવીને સ્થળ પરથી તાત્કાલિક નાસી છૂટ્યા હતા. મોડી રાત્રે અચાનક ભડકે બળતી જ્વાળાઓ અને ધુમાડાના ગોટા દેખાતાં સમગ્ર વિસ્તારમાં ભારે અફડાતફડી અને ગભરાટનો માહોલ સર્જાયો હતો.
4 એક્ટિવા અને 1 બાઇક બળીને ખાખ
આગચંપીની આ ઘટનામાં પાર્ક કરેલા કુલ 5 વાહનો જેમાં 4 એક્ટિવા અને 1 બાઇકનો સમાવેશ થાય છે તે સંપૂર્ણપણે બળીને ખાખ થઈ ગયા હતા. ધુમાડા અને અવાજને કારણે સ્થાનિક રહીશો તાત્કાલિક ઊંઘમાંથી જાગી ગયા હતા અને ઘટનાની ગંભીરતા જોઈ ઘરોમાંથી બહાર દોડી આવ્યા હતા. સ્થાનિકોએ એકઠા થઈને પાણીનો મારો ચલાવી ભારે મથામણ બાદ આગ પર કાબૂ મેળવ્યો હતો, પરંતુ ત્યાં સુધીમાં તમામ પાંચેય વાહનો બળીને રાખ થઈ ચૂક્યા હતા.