આણંદ જિલ્લાના ખંભોળજ પોલીસ સ્ટેશન વિસ્તારમાંથી સગીરાને ભગાડી જવાના બહુચર્ચિત અને ચકચારી કેસમાં પોલીસે કાયદાનો આકરો કોરડો વીંઝ્યો છે. ખંભોળજ પોલીસની ટીમને ચોક્કસ બાતમી મળી હતી કે સગીરાને ભગાડી જનાર મુખ્ય આરોપી મોરબી તરફ ભાગી છૂટ્યો છે. બાતમીના આધારે પોલીસે ત્વરિત દરોડો પાડીને મોરબીથી સગીરાને હેમખેમ શોધી કાઢી હતી અને મુખ્ય આરોપી મેહુલકુમાર ગોવિંદભાઈ ઠાકોરને ઝડપી પાડી આગળની કાર્યવાહી હાથ ધરી હતી.
આશ્રય અને કાર આપનારા મદદગારો પણ જેલહવાલે
પોલીસ તપાસમાં ચોંકાવનારો ખુલાસો થયો છે કે આ ગુનામાં માત્ર મુખ્ય આરોપી જ નહીં, પરંતુ તેને વાહન અને રહેવાની સગવડ પૂરી પાડનારા મદદગારો પણ એટલા જ દોષિત બન્યા છે. પોલીસે કાયદાકીય શિકંજો કસીને ગુનામાં સાથ-સહકાર આપનાર પિયુષકુમાર કનુભાઈ ઠાકોર, આકાશકુમાર રજનીભાઈ વાઘેલા અને ઈનોવા કારના માલિક કુણાલકુમાર કિરીટભાઈ પટેલની પણ ધરપકડ કરી છે. ગુના માટે ઈનોવા ગાડીઓની વ્યવસ્થા કરવા બદલ તમામ સામે ગુનો દાખલ કરવામાં આવ્યો છે.
