અરવલ્લી જિલ્લાના ધનસુરા તાલુકાના નવલપુર ગામ નજીક ગુજરાત રાજ્ય પરિવહન નિગમ (ST)ની એક બસને ગમખ્વાર અકસ્માત નડ્યો હોવાની ઘટના સામે આવી છે. અમદાવાદના રાણીપ ડેપોથી મોડાસા તરફ જઈ રહેલી એસટી બસ માર્ગ પરથી પસાર થઈ રહી હતી, ત્યારે અચાનક એક ઊંટ બસની આડે આવી ગયું હતું. ચાલુ બસે ઊંટ સાથે થયેલી આ ભયાનક ટક્કરમાં ઊંટનું ઘટનાસ્થળે જ કમકમાટીભર્યું મોત નીપજ્યું હતું. જો કે, સદનસીબે મોટી જાનહાનિ ટળી હતી.
ધડાકાભેર ટક્કર સાથે બસનો આગળનો કાચ તૂટ્યો
અકસ્માતની વિગત એવી છે કે રાણીપ-મોડાસા રૂટની એસટી બસ જ્યારે ધનસુરાના નવલપુર હાઈવે પરથી પસાર થઈ રહી હતી, ત્યારે અચાનક એક મોટું ઊંટ દોડીને બસની સામે આવી ગયું હતું. બસ ચાલકે બ્રેક મારવાનો પૂરતો પ્રયાસ કર્યો હોવા છતાં ઊંટ બસના આગળના ભાગે ધડાકાભેર અથડાયું હતું. આ ટક્કર એટલી જોરદાર હતી કે બસની બોનેટના ભાગને નુકસાન થયું હતું અને આગળનો મુખ્ય કાચ કડડભૂસ થઈને તૂટી ગયો હતો.
