અરવલ્લી જિલ્લાના મેઘરજ પંથકમાંથી આગની એક ગંભીર ઘટના સામે આવી છે. મેઘરજ તાલુકાના રામગઢી ગામના ભુતીયા વિસ્તારમાં રહેતા લબાના જ્યતીભાઈ નારસિંગભાઈના મકાનમાં અચાનક આગ ફાટી નીકળી હતી. મકાનમાં આગ લાગવાની આ અચાનક બનેલી ઘટનાને કારણે આસપાસના વિસ્તારમાં ભારે દોડધામ અને અફરાતફરી મચી ગઈ હતી અને મોટી સંખ્યામાં લોકોનાં ટોળેટોળાં ઘટનાસ્થળે ઉમટી પડ્યા હતા.
ઘરમાં રાખેલો ઘાસચારો બળીને ખાખ, અંદાજે 1 લાખનું નુકસાન
પ્રાપ્ત વિગતો અનુસાર, આગ એટલી વિકરાળ હતી કે તેની ઝપેટમાં આવી જવાથી ઘરમાં સંગ્રહ કરીને રાખવામાં આવેલો પશુઓનો ઘાસચારો સંપૂર્ણપણે બળીને ખાખ થઈ ગયો હતો. આ અકસ્માતમાં પશુપાલકને મોટું આર્થિક નુકસાન વેઠવાનો વારો આવ્યો છે, પ્રાથમિક અંદાજ મુજબ આ આગમાં આશરે રૂ.1 લાખ જેટલું નુકસાન થયું હોવાનું અનુમાન લગાવવામાં આવી રહ્યું છે. જોકે, સદનસીબે કોઈ મોટી જાનહાનિના અહેવાલ નથી.