બનાસકાંઠા જિલ્લાની કાંકરેજ તાલુકાની મહત્વપૂર્ણ ગણાતી થરા નગરપાલિકાની સામાન્ય ચૂંટણીનું મતદાન હવે તેના અંતિમ ચરણોમાં પહોંચી ગયું છે. થરા નગરપાલિકાની કુલ 24 બેઠકો પર ચૂંટણી યોજાઈ રહી છે, જેમાં વિવિધ રાજકીય પક્ષો અને અપક્ષ મળી કુલ 59 ઉમેદવારોનું રાજકીય ભવિષ્ય નક્કી કરવા માટે મતદારો ઉત્સાહપૂર્વક મતાધિકારનો ઉપયોગ કરી રહ્યા છે. ચૂંટણી પ્રક્રિયાને શાંતિપૂર્ણ માહોલમાં સંપન્ન કરાવવા માટે ચૂસ્ત પોલીસ બંદોબસ્ત તૈનાત કરવામાં આવ્યો છે.
મતદાન મથકો પર મતદારોની લાંબી લાઈનો
ચૂંટણી તંત્ર દ્વારા જાહેર કરવામાં આવેલા સત્તાવાર આંકડા અનુસાર, સાંજે 5 વાગ્યા સુધીમાં થરા નગરપાલિકા વિસ્તારમાં 78.58% જેટલું ભારે મતદાન નોંધાઈ ચૂક્યું છે. સવારથી જ તમામ વોર્ડના મતદાન મથકો પર પુરુષો, મહિલાઓ અને નવયુવાન મતદારોની લાંબી લાઈનો જોવા મળી હતી. ઊંચા ટકાવારીવાળા આ રેકોર્ડબ્રેક મતદાનથી ચૂંટણી લડી રહેલા તમામ ઉમેદવારો અને રાજકીય પક્ષોના ધબકારા વધી ગયા છે.