ભચાઉ-સામખિયાળી નેશનલ હાઇવે પર ગત મોડી રાત્રે માલસામાન ભરીને પૂરપાટ ઝડપે દોડતી એક આઇશર ટ્રકના એન્જિનના ભાગમાંથી અચાનક ધુમાડા નીકળવાનું શરૂ થયું હતું. ડ્રાઇવરે ગાડી રોકે તે પહેલાં જ શોર્ટ સર્કિટના કારણે લાગેલી આગે વિકરાળ સ્વરૂપ ધારણ કરી લીધું હતું અને જોતજોતામાં આખી આઇશર ટ્રક અગનજ્વાળાઓમાં ઘેરાઈ ગઈ હતી.
હાઇવે પર ભયનો માહોલ અને કલાકો સુધી ટ્રાફિક જામ
રાત્રિના અંધકારમાં હાઇવે પર ટ્રક સળગતી જોઈને ત્યાંથી પસાર થતા અન્ય વાહનચાલકોમાં પણ ભયનો માહોલ સર્જાયો હતો. સુરક્ષાના ભાગરૂપે હાઇવે પર બંને તરફના વાહનો થંભાવી દેવામાં આવ્યા હતા, જેના કારણે લાંબો ટ્રાફિક જામ સર્જાયો હતો અને મુસાફરો તેમજ કમર્શિયલ વાહનો ૩ કલાક સુધી અટવાઈ પડ્યા હતા. ઘટનાની માહિતી મળતા જ ભચાઉ પોલીસ અને ભચાઉ નગરપાલિકાની ફાયર બ્રિગેડની ટીમ વોટર ટેન્કરો સાથે તાત્કાલિક ઘટનાસ્થળે દોડી આવી હતી.
