રાજકોટ જિલ્લાના જામકંડોરણા શહેરમાંથી દિવાળીના તહેવાર વચ્ચે એક અત્યંત દુઃખદ અને ચિંતાજનક ઘટના સામે આવી છે. જામકંડોરણાના વ્યસ્ત ભાદરા નાકા પાસે આવેલા બજારમાં ખરીદી કરવા નીકળેલા એક દંપતી સાથે અણધારી દુર્ઘટના સર્જાઈ હતી. તહેવારના માહોલમાં ઠેર-ઠેર ફટાકડા ફોડવામાં આવી રહ્યા હતા, તે દરમિયાન અચાનક ક્યાંકથી આવી ચડેલું ફટાકડાનું રોકેટ ખરીદી કરી રહેલી મહિલાના માથામાં વાગતા તેઓ ગંભીર રીતે ઘાયલ થયા હતા.
બજારમાં ખરીદી કરતા દંપતી પર આવી આફત
પ્રાપ્ત વિગતો અનુસાર, દિવાળીના પર્વ નિમિત્તે જામકંડોરણાના ભાદરા નાકા વિસ્તારમાં પત્ની અને પતિ બજારમાં જરૂરી ચીજવસ્તુઓની ખરીદી કરવા માટે નીકળ્યા હતા. ચારેય બાજુ લોકો ઉત્સવ ઉજવી રહ્યા હતા અને ફટાકડા ફૂટી રહ્યા હતા, તે જ ટાણે અચાનક એક બેકાબૂ ફટાકડાનું રોકેટ સીધું જ બજારમાં ખરીદી કરી રહેલી મહિલાના માથામાં આવીને વાગ્યું હતું. આ અકસ્માતના કારણે મહિલાના માથાના ભાગે ગંભીર ઈજાઓ પહોંચી હતી અને ઘટનાસ્થળે અફરાતફરી મચી ગઈ હતી.