ભરૂચ જિલ્લાના ઉદ્યોગનગરી ગણાતા અંકલેશ્વર પંથકમાંથી એક ચિંતાજનક અને રહસ્યમય ઘટના સામે આવી છે. અંકલેશ્વરના ભડકોદ્રા ગામે આવેલી ડંપિંગ સાઇટ પર અચાનક ભીષણ આગ ફાટી નીકળવાની ઘટના બની છે. ખાસ કરીને ચોંકાવનારી વાત એ છે કે માત્ર બે દિવસના ટૂંકા ગાળામાં આ જ ડંપિંગ સાઈટ પર આગ લાગવાની આ બીજી ઘટના છે, જેના કારણે આકાશી દ્રશ્યો પણ સામે આવ્યા છે અને સમગ્ર વિસ્તારમાં ચકચાર મચી ગઈ છે.
ભડકોદ્રા ડંપિંગ સાઈટ પર આગના આકાશી દ્રશ્યો આવ્યા સામે
પ્રાપ્ત વિગતો અનુસાર, ભડકોદ્રા ગામની હદમાં આવેલી આ ડંપિંગ સાઈટ પર અચાનક આગ ભભૂકી ઉઠતા કાળા ડિબાંગ ધુમાડાના ગોટેગોટા અને આગની ઊંચી જ્વાળાઓ દૂર-દૂર સુધી નજરે પડી રહી હતી. આ આગના આકાશી દ્રશ્યો પણ સામે આવ્યા છે, જે દર્શાવે છે કે આગ કેટલી વિકરાળ સ્વરૂપમાં હતી. કચરા અને નકામા પદાર્થોના જથ્થાને કારણે આગે ઝડપથી આસપાસના વિસ્તારને પોતાની લપેટમાં લઈ લીધો હતો.