ભાવનગર શહેરમાં અસામાજિક તત્વોનો આતંક દિવસાંતે વધી રહ્યો છે, જેનો તાજો કિસ્સો કુંભારવાડા વિસ્તારમાંથી સામે આવ્યો છે. કુંભારવાડા માઢીયા રોડ પર આવેલા પંપિંગ સ્ટેશન પાસે એક યુવક પર ચાર જેટલા શખ્સોએ ઘાતકી હુમલો કર્યો હતો. અસામાજિક પ્રવૃત્તિઓનો વિરોધ કરવા જેવી સામાન્ય બાબતમાં યુવકને નિશાન બનાવવામાં આવતા સમગ્ર પંથકમાં ભય અને રોષનો માહોલ જોવા મળી રહ્યો છે.
દારૂ-ગાંજો પીવાની ના પાડવાની દાઝ રાખી માર્યો માર
મળતી માહિતી મુજબ, ઈજાગ્રસ્ત યુવકે અગાઉ આ વિસ્તારમાં કેટલાક શખ્સોને દારૂ અને ગાંજો પીવાની ના પાડી હતી. આ બાબતની અદાવત અને દાઝ રાખીને ચાર હુમલાખોરોએ યુવકને એકલો જોઈને ઘેરી લીધો હતો. હુમલાખોરોએ ધોકા, લોખંડની પાઇપ અને ઢીકા-પાટા વડે યુવકને બેરહેમીપૂર્વક માર માર્યો હતો. આ હિંસક ઘટનાના સીસીટીવી ફૂટેજ પણ સોશિયલ મીડિયા પર વાયરલ થયા છે, જેમાં હુમલાખોરોની ગુંડાગર્દી સ્પષ્ટ જોઈ શકાય છે.