ભાવનગર શહેરમાં નશાકારક અને પ્રતિબંધિત દવાઓના ગેરકાયદેસર વેચાણ વિરુદ્ધ પોલીસે લાલ આંખ કરી છે. ભાવનગરના કુંભારવાડા વિસ્તારમાંથી બોરતળાવ પોલીસની ટીમે બાતમીના આધારે દરોડો પાડીને કોર્ડિંન કફ સીરપના મોટા જથ્થા સાથે એક શખ્સને રંગેહાથ ઝડપી પાડ્યો છે. પોલીસના જણાવ્યા અનુસાર પકડાયેલો આરોપી કુંભારવાડાની ગોપાલ સોસાયટીમાં રહે છે અને તે ત્યાં ગેરકાયદેસર રીતે આ સિરપનું વેચાણ કરતો હતો. પોલીસે આરોપી પાસેથી 'કોર્ડિંન કફ સીરપ' ની 193 નંગ બોટલો જપ્ત કરી છે, જેનો ઉપયોગ યુવાધન નશા તરીકે કરતું હોવાની આશંકા છે.
રૂ. 30,400થી વધુનો મુદ્દામાલ જપ્ત
બોરતળાવ પોલીસ દ્વારા કરવામાં આવેલી આ સફળ રેડ દરમિયાન કુલ રૂ. 30,400થી વધુની કિંમતનો મુદ્દામાલ જપ્ત કરવામાં આવ્યો છે. પકડાયેલા શખ્સની પ્રાથમિક પૂછપરછમાં પોલીસ સામે એક મોટો ખુલાસો થયો છે. આરોપીએ કબૂલાત કરી છે કે તે માત્ર સ્થાનિક સ્તરે આ જથ્થાનું વેચાણ કરતો હતો, પરંતુ તેને આ કફ સીરપનો મોટો જથ્થો પૂરો પાડનાર મુખ્ય સપ્લાયર કોઈ અન્ય જ વ્યક્તિ છે. પોલીસ દરોડાની ગંધ આવી જતાં આ ગેરકાયદે નેટવર્કનો મુખ્ય સપ્લાયર ઘટનાસ્થળેથી ભાગી છૂટવામાં સફળ રહ્યો હતો અને હાલ તે ફરાર જાહેર કરાયો છે.