ભાવનગર સરકારી મેડિકલ કોલેજમાંથી શિક્ષણ જગતને શર્મસાર કરતી એક મોટી ઘટના સામે આવી છે. કોલેજના ઓર્થોપેડિક વિભાગમાં પ્રથમ વર્ષમાં અભ્યાસ કરતા 13 જેટલા જુનિયર વિદ્યાર્થીઓ ક્રૂર રેગિંગનો ભોગ બન્યા છે. આરોપ છે કે, આ જ વિભાગના 6 સિનિયર ડોક્ટરોએ માનવતાની તમામ હદો વટાવીને આ જુનિયર વિદ્યાર્થીઓનું એક-બે દિવસ નહીં, પરંતુ છેલ્લા 5 મહિનાથી અલગ-અલગ પ્રકારે સતત શોષણ અને રેગિંગ ચાલુ રાખ્યું હતું. તબીબી ક્ષેત્રે ભવિષ્ય બનાવવા આવેલા યુવાનો આ સિનિયરોના ત્રાસથી ફફડી ઉઠ્યા હતા.
5 મહિના સુધી અલગ-અલગ પ્રકારે અપાતો હતો ત્રાસ
ભોગ બનનાર જુનિયર તબીબો પાસેથી મળતી વિગતો મુજબ સિનિયર ડોક્ટરો દ્વારા છેલ્લા 5 માસથી તેમનું શારીરિક અને માનસિક શોષણ કરવામાં આવતું હતું. અલગ-અલગ બહાને તેમને મોડી રાત સુધી હેરાન કરવા, માનસિક ટોર્ચર કરવું અને ધાક-ધમકીઓ આપવી જેવી પ્રવૃત્તિઓ બેરોકટોક ચાલી રહી હતી. ભવિષ્ય બગડવાના ડરે વિદ્યાર્થીઓ અત્યાર સુધી આ અત્યાચાર મૂંગા મોઢે સહન કરી રહ્યા હતા, પરંતુ અંતે પાણી માથા પરથી જતાં સમગ્ર મામલો કોલેજ પ્રશાસન અને એન્ટી રેગિંગ કમિટી સમક્ષ પહોંચ્યો છે.
