બોટાદ જિલ્લાના ગઢડા તાલુકાના ઢસા PGVCL કચેરીની ઘોર બેદરકારી સામે આવતા ભારે ચકચાર મચી ગઈ છે. ગઢડાના જલાલપુર ગામે વીજ તંત્રની લાપરવાહીનો એવો કિસ્સો સામે આવ્યો છે, જેને જોઈને સૌકોઈ આશ્ચર્યચકિત થઈ ગયા છે. ગામમાં વીજ કનેક્શન કે મીટર ફીટ કરવામાં આવ્યા ન હોવા છતાં ગ્રાહકોને લાઈટ બિલ મોકલી આપવામાં આવતા તંત્રની કામગીરી સામે ગંભીર સવાલો ઊભા થયા છે.
કેબલ અને મીટર નથી છતાં બન્ને ગ્રાહકોને 818 રૂપિયાનું બિલ
પ્રાપ્ત વિગતો અનુસાર, જલાલપુર ગામના રહેવાસી શૈલેષભાઈ કેશુભાઈ ડોડીયા અને ગોબરભાઈ કાળાભાઈ સોલંકી દ્વારા ઘર વપરાશ માટે નવા વીજ કનેક્શન મેળવવા માટે અરજી કરવામાં આવી હતી. આ અરજી બાદ સ્થળ પર માત્ર વીજ પોલ નાખવામાં આવ્યા છે, પરંતુ હજુ સુધી ન તો કેબલ નાખવામાં આવ્યો છે, અને ન તો કોઈ મીટર બેસાડવામાં આવ્યું છે. છતાં પણ આશ્ચર્યજનક રીતે આ બંને ગ્રાહકોને તંત્ર દ્વારા રૂ. 818 - 818 નું લાઈટ બિલ ફટકારી દેવામાં આવ્યું છે.
