રાણપુર શહેરના સામુહિક આરોગ્ય કેન્દ્ર (CHC) ખાતે ચાલતી સરકારી યોજનાઓમાં ગેરરીતિ આચરવામાં આવતી હોવાનો ચોંકાવનારો મારો સામે આવ્યો છે. ‘માં અમૃતમ યોજના’ અંતર્ગત દર્દીઓ સાથે છેતરપિંડી થઈ હોવાના આક્ષેપોથી સ્થાનિક રાજકારણ અને આરોગ્ય વિભાગમાં હલચલ મચી ગઈ છે.
વિરોધ પક્ષના નેતાના ગંભીર આક્ષેપો
રાણપુર તાલુકા પંચાયતના વિરોધ પક્ષના નેતા દ્વારા આ સમગ્ર મામલે લેખિત રજૂઆત કરીને તંત્ર સમક્ષ ઉચ્ચસ્તરીય તપાસની માંગ કરવામાં આવી છે. રજૂઆત મુજબ, હોસ્પિટલમાં આવતા કેટલાક ગરીબ દર્દીઓને રૂ. 300 રોકડા આપવાની લાલચ આપવામાં આવતી હતી અને તેમને ઓન-પેપર (કાગળ પર) હોસ્પિટલમાં દાખલ બતાવી તેમના અમૃતમ કાર્ડમાંથી અંદાજે રૂ. 1,800 જેટલી રકમ ગેરકાયદે કાપી લેવામાં આવતી હતી. આ પ્રકારની ઘટના માત્ર એક જ નહીં, પરંતુ અનેક દર્દીઓ સાથે બની હોવાની પ્રબળ સંભાવના વ્યક્ત કરાઈ છે.
