બોટાદ પોલીસ સ્ટેશન વિસ્તારમાં લોકોના આરોગ્ય સાથે ચેડાં કરતા એક બોગસ ડોક્ટરનો બોટાદ સ્પેશિયલ ઓપરેશન ગ્રુપ (SOG) દ્વારા પર્દાફાશ કરવામાં આવ્યો છે. પોલીસ મહાનિરીક્ષક રાજેન્દ્ર અસારીની સૂચના અને જિલ્લા પોલીસ અધિક્ષક ધર્મેન્દ્ર શર્માના માર્ગદર્શન હેઠળ SOG PI પી.જી. ડાવરાની ટીમે આ કામગીરી પાર પાડી હતી. સાલૈયા ગામે રામજી મંદિર નજીક આવેલા એક મકાનમાં બોગસ ડોક્ટર દવાખાનું ચલાવતો હોવાની ચોક્કસ બાતમી મળી હતી. જેના આધારે SOG ટીમે સ્થાનિક મેડિકલ ઓફિસરને સાથે રાખી સ્થળ પર અચાનક તપાસ હાથ ધરી હતી.
વિજયભારથી ગોસ્વામી નામનો ઈસમ પકડાયો
તપાસ દરમિયાન વિજયભારથી ગણપતભારથી ગોસ્વામી નામનો ઈસમ કોઈ પણ પ્રકારની માન્ય મેડિકલ ડિગ્રી કે લાયકાત વગર જ દર્દીઓની સારવાર કરતો હોવાનું સામે આવ્યું હતું. તે કોઈપણ અધિકૃત રજિસ્ટ્રેશન વગર ગેરકાયદેસર રીતે એલોપેથિક તબીબી પ્રેક્ટિસ કરી રહ્યો હતો. સામાન્ય નાગરિકોની અજાણતાનો લાભ ઉઠાવીને તેમના સ્વાસ્થ્ય માટે જોખમ ઊભું કરનાર આ ઈસમ સામે સ્થળ પર જ કાયદેસરની કાર્યવાહી શરૂ કરવામાં આવી હતી.