છોટાઉદેપુર જિલ્લાના કવાંટ તાલુકામાં આવેલ રાયસિંગપુરા ગામે દીપડાના હુમલાની અત્યંત કમકમાટીભરી અને હૃદયદ્રાવક ઘટના સામે આવી છે. રાત્રિના સમયે ઘરમાં સૂતેલા ૬૫ વર્ષીય રહલીબેન રેવજીભાઈ નાયક પર અચાનક આવી ચડેલા દીપડાએ ત્રાટકીને હુમલો કર્યો હતો. હિંસક દીપડો વૃદ્ધાને ઢસડીને ગામની સીમમાં ખેંચી ગયો હતો અને ત્યાં તેમને ઘાતકી રીતે ફાડી ખાધા હતા.
માથું ધડથી અલગ હાલતમાં મળતાં ભારે અરેરાટી
સવારે જ્યારે ગ્રામજનો દ્વારા શોધખોળ હાથ ધરવામાં આવી ત્યારે સીમમાંથી રહલીબેનનો મૃતદેહ મળી આવ્યો હતો. દીપડાએ વૃદ્ધા પર એ હદે ભયાનક હુમલો કર્યો હતો કે તેમનું માથું ધડથી અલગ થઈ ગયેલી હાલતમાં મળી આવ્યું હતું. આ ભયાનક દ્રશ્ય જોઈને સમગ્ર વિસ્તારમાં ભારે અરેરાટી અને શોકનું મોજું ફરી વળ્યું હતું.