ડાંગ જિલ્લાના આહવા તાલુકા હેઠળ આવતા જામલાપાડા ગામે ઘરમાં એકલા રહેતા વૃદ્ધાની સિમેન્ટના બ્લોક વડે ઘાતકી હત્યા કરવામાં આવતા ચકચાર મચી ગઈ છે. આ ચકચારી બનાવમાં પરિવારમાં સુખ-શાંતિ ન હોવા અને કામ-ધંધામાં બરકત ન મળવાના વહેમ રાખીને ખુદ કુટુંબી પૌત્રે જ આ હત્યાને અંજામ આપ્યો હોવાનું સામે આવતા પોલીસે ત્વરિત કાર્યવાહી હાથ ધરી છે.
પરિવારમાં સુખ અને શાંતિ ન હોવા બાબતે સતત શંકાઓ
મળતી વિગતો અનુસાર, આહવા તાલુકાના અંતરિયાળ વિસ્તારમાં આવેલા જામલાપાડા ગામે એક વૃદ્ધા પોતાના ઘરમાં એકલા જીવન ગુજારી રહ્યા હતા. દરમિયાન વૃદ્ધાના જ કુટુંબી પૌત્ર પ્રમોદભાઈ ચંદુભાઈ પવારના મનમાં પોતાના પરિવારમાં સુખ અને શાંતિ ન હોવા બાબતે સતત શંકાઓ પેદા થઈ રહી હતી. આ ઉપરાંત પોતાના કામ-ધંધામાં પણ કોઈ પ્રકારની બરકત મળતી ન હોવાથી તે સતત અશાંતિ અનુભવી રહ્યો હતો.
આ વૃદ્ધા જવાબદાર હોવાનો ગંભીર વહેમ હતો
આ સમગ્ર બાબત પાછળ પોતાના જ ઘરમાં એકલા રહેતા આ વૃદ્ધા જવાબદાર હોવાનો ગંભીર વહેમ તેણે પોતાના મનમાં પાળી રાખ્યો હતો. આ વહેમ અને અશાંતિના કારણે આરોપી પ્રમોદ પવાર આવેશમાં આવી ગયો હતો અને તેણે આ વૃદ્ધાનો કાંટો કાયમ માટે કાઢી નાખવાનો ભયાનક નિર્ણય કર્યો હતો. વૃદ્ધા જ્યારે ઘરની બહાર આવેલા બાથરૂમ પાસે હાજર હતા, ત્યારે આરોપી પૌત્ર ત્યાં પહોંચ્યો હતો અને તેમની સાથે ઘાતકી કૃત્ય આચર્યું હતું.
સિમેન્ટના કોંક્રિટના બ્લોક વડે ઘા ઝીંકી હત્યા
આરોપી પ્રમોદભાઈ ચંદુભાઈ પવારે ઘરની બહાર બાથરૂમ પાસે એકલવાયા વૃદ્ધાને નિશાન બનાવી તેમના માથાના ભાગે સિમેન્ટના કોંક્રિટના બ્લોક એટલે કે ભારે પથ્થર વડે ઉપરાઉપરી જીવલેણ ઘા ઝીંકી દીધા હતા. માથાના અત્યંત નાજુક ભાગમાં સિમેન્ટના કોંક્રિટ બ્લોકના ગંભીર પ્રહારો વાગવાને કારણે વૃદ્ધા લોહીલુહાણ હાલતમાં ત્યાં જ ફસડાઈ પડ્યા હતા અને ગંભીર ઈજાઓ પહોંચવાના લીધે તેમનું ઘટનાસ્થળે જ કરુણ મોત નીપજ્યું હતું.
પોલીસે સ્થળ પર પહોંચી આરોપીને ઝડપી પાડ્યો
આ ઘટનાની જાણ થતાં જ આહવા પોલીસ મથકનો કાફલો તાત્કાલિક જામલાપાડા ગામે પહોંચી ગયો હતો. આહવા પોલીસે ઘટનાસ્થળની સ્થિતિનું બારીકાઈથી નિરીક્ષણ કરી હત્યાનો ભોગ બનેલા વૃદ્ધાના સંદર્ભે કાયદેસરનો ગુનો દાખલ કર્યો હતો. પોલીસે ગણતરીના સમયમાં જ આરોપી કુટુંબી પૌત્ર પ્રમોદભાઈ ચંદુભાઈ પવારની ધરપકડ કરી તેને જેલના સળિયા પાછળ ધકેલી દીધો છે. હાલમાં આહવા પોલીસ દ્વારા સમગ્ર હત્યા કેસમાં આગળની કાયદેસરની તપાસ અને કડક કાર્યવાહી હાથ ધરવામાં આવી રહી છે.
આ પણ વાંચો : Explainer: ગરીબીમાં બાળપણ, લગ્ન વગર 5 બાળકોના પિતા, રોનાલ્ડોની ફૂટબોલના રાજા બનવાની સફર!
