જંબુસર ખાતે રહેતા એક શિક્ષકની 24 વર્ષીય ડોક્ટર પુત્રીને પ્રેમજાળમાં ફસાવી વડોદરાથી ભગાડી લઈ જવાના પ્રકરણમાં ચોંકાવનારો વળાંક આવ્યો છે. આ કિસ્સામાં યુવતી સાથે કોર્ટ મેરેજ થયા હોવાનું દર્શાવતું બનાવટી મેરેજ સર્ટિફિકેટ ઊભું કરવામાં આવ્યું હોવાનો ગંભીર આક્ષેપ થયો હતો. બનાવટી દસ્તાવેજોના આધારે છેતરપિંડી આચરવામાં આવી હોવાની ફરિયાદ નોંધાતાં જંબુસર પોલીસે કૂટદસ્તાવેજ અને છેતરપિંડીની વિવિધ કલમો હેઠળ ગુનો નોંધી સઘન તપાસ શરૂ કરી હતી.
પોલીસ તપાસમાં કરજણ બાદ વડોદરાના કનેક્શનનો પર્દાફાશ
પોલીસ સબ ઇન્સ્પેક્ટર કે.બી. રાઠવા દ્વારા હાથ ધરાયેલી તપાસમાં અગાઉ કરજણ તાલુકાના કિયા ગામના યુવાનની ધરપકડ કરવામાં આવી હતી. આ અટકાયત કરાયેલા શખ્સની ઊંડાણપૂર્વક પૂછપરછ કરવામાં આવતાં સમગ્ર રેકેટમાં વડોદરાના એક ઈસમની મુખ્ય ભૂમિકા હોવાનું સામે આવ્યું હતું. પૂછપરછમાં ખુલાસો થયો હતો કે, લગ્ન નોંધણી સંબંધિત તમામ ખોટા કાગળો અને પ્રોસેસ કરવા માટે વડોદરાના ભરતભાઈ રયજીભાઈ વણકરનો સંપર્ક કરવામાં આવ્યો હતો.
વાઘોડિયા રોડ પરથી ભરત વણકરની નાટ્યાત્મક અટકાયત
બાતમીદારો અને ટેકનિકલ એનાલિસિસના આધારે તપાસ અધિકારી કે. બી. રાઠવા અને તેમની ટીમે વડોદરા ખાતે દરોડો પાડ્યો હતો. વાઘોડિયા રોડ પર આવેલી રામપાર્ક સોસાયટી નજીક સિદ્ધેશ્વર હિલટોનમાં સ્થિત મકાનમાંથી આરોપી ભરતભાઈ રયજીભાઈ વણકર મળી આવ્યા હતા. પોલીસે તુરંત તેમની અટકાયત કરી જંબુસર પોલીસ મથકે લાવી કાયદેસરની ધરપકડ કરી આગળની કાર્યવાહી હાથ ધરી છે.
કૂટદસ્તાવેજો અને અન્ય સંડોવાયેલા શખ્સો અંગે તપાસ તેજ
આ બનાવટી મેરેજ સર્ટિફિકેટ તૈયાર કરવામાં કયા કયા સરકારી કે ખાનગી દસ્તાવેજોનો ખોટી રીતે ઉપયોગ કરવામાં આવ્યો હતો તેની પોલીસે તપાસ આદરી છે. આ ઉપરાંત આ કૌભાંડમાં સરકારી કચેરી કે અન્ય કોઈ મધ્યસ્થીઓની સંડોવણી છે કે કેમ તે તમામ પાસાઓ પર પૂછપરછ ચાલુ છે. આવનારા દિવસોમાં આ પ્રકરણમાં વધુ ચોંકાવનારી વિગતો અને નામો બહાર આવે તેવી પૂરેપૂરી શક્યતા સેવાઈ રહી છે.
આ પણ વાંચો - Bharuch News: જંબુસર અને દહેજ વચ્ચે ઢાઢર નદી પર 66 કરોડના ખર્ચે બનેલા બ્રિજનું લોકાર્પણ કરાયું
