ભાવનગર શહેર અને જિલ્લામાં રોકાણકારોને રાતોરાત અમીર બનવાના સપના બતાવી કરોડો રૂપિયાનું ફૂલેકું ફેરવનાર ધામેચા બ્રધર્સના સ્કેમમાં ભાવનગર LCB પોલીસને મોટી સફળતા મળી છે. થોડા દિવસો પહેલા જ પકડાયેલા મુખ્ય સૂત્રધાર સંજય ધામેચાની પૂછપરછમાં તેના જ પિતરાઈ ભાઈ યોગેશ ધામેચાનું નામ ખુલ્યું હતું. યોગેશ આ સમગ્ર ગેરકાયદેસર પોન્ઝી સ્કીમના નાણાકીય વ્યવહારો સંભાળતો હોવાના પુરાવા મળતા પોલીસે તેની પણ ધરપકડ કરી લીધી છે. આ બંને ભાઈઓએ ભેગા મળીને ભાવનગરના મહેનતકશ વર્ગને નિશાન બનાવ્યો હતો.
10 હજારથી લાખોનું રોકાણ કરાવી ગુપ્ચુપ ઓફિસ સંકેલી લીધી
પોલીસ તપાસ અને સ્થાનિકોની ફરિયાદ અનુસાર, આ આખી ટોળકીએ બજારમાં એવી લોભામણી જાહેરાતો અને સ્કીમો ચલાવી હતી કે જો કોઈ વ્યક્તિ તેમની પાસે પૈસા રોકે તો તેને દર મહિને ૨૦% જેટલું માતબર વળતર આપવામાં આવશે. આ સ્કીમમાં ભાવનગરના હબ ગણાતા ડાયમંડ ઉદ્યોગના રત્નકલાકારો, ખાનગી ટ્રાવેલ્સ અને પરિવારોના ડ્રાઇવરો તેમજ નાના નાના વેપારીઓ ફસાયા હતા. લોકોએ પોતાની આખી જિંદગીની બચત, સોનું વેચીને કે લોન લઈને 10 હજારથી શરૂ કરીને લાખો રૂપિયા સુધીનું આંધળું રોકાણ આ બંને ભાઈઓની કંપનીમાં કરી દીધું હતું.