બોટાદ જિલ્લામાં ગેરકાયદે પ્રવૃત્તિઓ ડામવા માટે પોલીસ દ્વારા સતત પ્રયાસો કરવામાં આવી રહ્યા છે. આ દરમિયાન બોટાદ લોકલ ક્રાઈમ બ્રાન્ચની ટીમે ઓનલાઈન મની ગેમિંગના એક મોટા ગેરકાયદે કારોબારનો પર્દાફાશ કરવામાં મોટી સફળતા મેળવી છે. પોલીસે ઈન્ટરનેટ અને વેબસાઈટના માધ્યમથી ચાલતા આ રેકેટનો પર્દાફાશ કરીને એક મુખ્ય આરોપીને ઝડપી પાડ્યો છે અને લાખો રૂપિયાનો મુદ્દામાલ કબજે કર્યો છે.
આરોપી અને જપ્ત કરાયેલા મુદ્દામાલ
પોલીસ તપાસમાં સામે આવ્યું છે કે, અંકુરભાઈ સંજયભાઈ જાદવ (રહે. ટાટમ ગામ, રામજી મંદિર પાસે, તા. ગઢડા, જી. બોટાદ) નામના શખ્સ દ્વારા પોતાના ઘરેથી કે અન્ય સ્થળેથી ઓનલાઈન ગેમિંગ વેબસાઈટ અને ઈન્ટરનેટ આધારિત મની ગેમિંગ પોર્ટલનું ગેરકાયદે સંચાલન કરવામાં આવતું હતું. બોટાદ LCBની ટીમે દરોડા દરમિયાન આરોપી પાસેથી મોબાઈલ ફોન, લેપટોપ તેમજ રોકડ રકમ સહિત કુલ રૂ.10,82,000 નો મોટો મુદ્દામાલ જપ્ત કર્યો છે.
