કચ્છ જિલ્લામાંથી કાયદો અને વ્યવસ્થાની સ્થિતિ સામે ગંભીર સવાલો ઊભા કરતી એક અત્યંત ચંકાવાનારી અને કમકમાટીભરી ઘટના સામે આવી છે. દિવાળીના તહેવારની ખરીદી માટે બજારોમાં લોકોની ભારે ભીડ જામી હતી, તે જ ટાણે કચ્છના માંડવી શહેરની મુખ્ય બજારમાં એક યુવતીની સરાજાહેર કરપીણ હત્યા કરવામાં આવી છે. ભાગીને પ્રેમલગ્ન કરનાર યુવતીને તેના જ પતિએ છરીના ઘા ઝીંકીને મોતને ઘાટ ઉતારી દેતા સમગ્ર પંથકમાં ભારે હાહાકાર મચી ગયો છે.
મંદિરમાં પ્રેમલગ્ન કર્યા બાદ પારિવારિક વિવાદમાં બની ઘટના
પ્રાપ્ત વિગતો અનુસાર, મૂળ સલાયાની રહેવાસી અને ખારવા સમાજની આ યુવતીએ અગાઉ પોતાના પરિવારની વિરુદ્ધ જઈને ભાગીને પ્રેમલગ્ન કર્યા હતા. જોકે, લગ્નજીવન દરમિયાન પતિ-પત્ની વચ્ચે કોઈ બાબતે મનદુઃખ કે વિવાદ ચાલી રહ્યો હતો. દિવાળીના પવિત્ર તહેવાર ટાણે જ્યારે માંડવીની મેઈન બજારમાં લોકો ખરીદી કરી રહ્યા હતા, ત્યારે તે શખ્સ ત્યાં આવી પહોંચ્યો હતો અને આવેશમાં આવીને પોતાની સાથે લાવેલી છરી કાઢીને યુવતી પર હુમલો કરી દીધો હતો.
ભરબજારે લોકોની અવન-જાવન વચ્ચે છરીના ઘા ઝીંકી દીધા
દિવાળીની ખરીદીને લઈને માંડવીની મુખ્ય બજારમાં અસંખ્ય લોકોની ભારે આવન-જાવન હતી. આ ભીડભાડવાળી જગ્યાએ જ આરોપી પતિએ યુવતી પર એક પછી એક છરીના આડેધડ ઘા ઝીંકી દીધા હતા. ભરબજારે સરાજાહેર બનેલી આ લોહીયાળ ઘટનાને પગલે બજારમાં નાસભાગ મચી ગઈ હતી અને ભારે ફફડાટ ફેલાઈ ગયો હતો. ગંભીર રીતે ઇજાગ્રસ્ત બનેલી યુવતી રક્તરંજિત હાલતમાં ઢળી પડી હતી, જેને સ્થાનિક લોકોની મદદથી તાત્કાલિક હોસ્પિટલ ખસેડવામાં આવી હતી, પરંતુ સારવાર મળે તે પહેલા જ તેનું કમકમાટીભર્યું મોત નીપજ્યું હતું.
માંડવી PI સહિતનો પોલીસ કાફલો ઘટનાસ્થળે દોડી ગયો
આ ગંભીર અને સનસનીખેજ હત્યાના સમાચાર મળતા જ માંડવી પોલીસ સ્ટેશનના પી.આઈ. (PI) તથા ઉચ્ચ પોલીસ અધિકારીઓનો કાફલો તાત્કાલિક હોસ્પિટલ અને ઘટનાસ્થળે દોડી આવ્યો હતો. પોલીસે બજારના સીસીટીવી (CCTV) ફૂટેજ અને પ્રત્યક્ષદર્શીઓની પૂછપરછના આધારે આરોપી પતિ સામે સઘન કાયદેસરની કાર્યવાહી હાથ ધરી છે. તહેવારના માહોલમાં બનેલી આ ઘટનાથી સમગ્ર માંડવી શહેરમાં શોક અને રોષની લાગણી ફેલાઈ ગઈ છે.
ગુજરાતના વધુ સમાચાર વાંચવા માટે ક્લિક કરો
