મહેસાણા જિલ્લામાં ગુનેગારો બેફામ બન્યા હોય તેમ કાયદો અને વ્યવસ્થાની સ્થિતિ દિન પ્રતિદિન કથળી રહી છે.આજે ખેરવા ગામમાં ધોળેદિવસે એક લૂંટની ઘટના સામે આવતા સમગ્ર પંથકમાં ચકચાર મચી ગઈ છે.લૂંટારુઓ એક વૃદ્ધને નિશાન બનાવી તેમની આંખમાં મરચાની ભૂકી નાખીને છરી વડે જીવલેણ હુમલો કરી રૂ. 1.50 લાખ રોકડ અને 8 તોલા સોનાની લૂંટ ચલાવી ફરાર થઈ ગયા હતાં.
થેલીના નકુચા કાપીને લાખોની મત્તા લૂંટી
મળતી માહિતી મુજબ, ખેરવા ગામના રહેવાસી 60 વર્ષીય વૃદ્ધ રમેશભાઈ ગોવિંદભાઈ પટેલ ખેરવા ક્રેડિટ કોઓપરેટીવ સોસાયટીમાંથી બહાર નીકળી રહ્યા હતા. તેઓ જેવા સોસાયટીની બહાર આવ્યા કે તરત જ અગાઉથી ટાંપીને બેઠેલા લૂંટારુઓએ તેમના પર હુમલો કર્યો હતો.લૂંટારુઓએ સૌપ્રથમ રમેશભાઈની આંખમાં મરચાની ભૂકી નાખી દીધી હતી. વૃદ્ધ કંઈ સમજે તે પહેલાં જ લૂંટારુઓએ તીક્ષ્ણ છરી વડે તેમના પર હુમલો કર્યો હતો. છરી રમેશભાઈના હાથમાં આરપાર ઘૂસી ગઈ હતી.લોહીલુહાણ હાલતમાં વૃદ્ધે પ્રતિકાર કરવાનો પ્રયાસ કર્યો પરંતુ લૂંટારુઓ તેમની પાસે રહેલી થેલીના નકુચા કાપીને લાખોની મત્તા લૂંટીને નાસી છૂટ્યા હતા.