પોરબંદર પંથકમાં માનવતાને શરમાવે તેવી એક અત્યંત ગંભીર અને શરમજનક ઘટના સામે આવી છે. જ્યાં ખેતમજૂરી કરતા પરિવારની 17 વર્ષીય સગીરા સાથે દુષ્કર્મ આચરાયું હોવાનો આક્ષેપ થયો છે. આ ઘટનાને પગલે સમગ્ર વિસ્તારમાં ભારે ચકચાર મચી ગઈ છે અને સ્થાનિક લોકોમાં ગહન રોષ જોવા મળી રહ્યો છે.
તબિયત લથડતાં સગીરા 3 માસની ગર્ભવતી હોવાનો ખુલાસો
મૂળ મધ્યપ્રદેશનો એક શ્રમિક પરિવાર પોરબંદર જિલ્લાના વાડી વિસ્તારમાં ખેતમજૂરી કરીને પોતાનું ગુજરાન ચલાવે છે. દરમિયાન, સગીરાની તબિયત અચાનક લથડતાં પરિવારજનો તેને તાત્કાલિક સારવાર અર્થે હોસ્પિટલ લઈ ગયા હતા. જ્યાં તબીબી તપાસ દરમિયાન સગીરા 3 મહિનાની ગર્ભવતી હોવાનું સામે આવતાં પરિવારજનોના પગ તળેથી જમીન સરકી ગઈ હતી.
19 જુલાઈની રાત્રે આચરાયું હતું દુષ્કર્મ
તબીબી રિપોર્ટ બાદ પરિવારજનોએ સગીરાની પ્રેમથી પૂછપરછ કરતાં તેણે આખી આપવીતી જણાવી હતી. સગીરાના જણાવ્યા અનુસાર, ગત 19 જુલાઈની રાત્રે તેની સાથે આ કુકર્મ આચરવામાં આવ્યું હતું. સગીરાએ પોતાની સાથે થયેલી આ દરિંદગી અંગે પરિવાર સમક્ષ વિગતવાર રજૂઆત કરી હતી.
આરોપી જીતેન્દ્ર સોલંકી સામે બગવદર પોલીસે નોંધ્યો પોક્સો હેઠળ ગુનો
આ સમગ્ર મામલે પરિવારે તાત્કાલિક પોલીસનો સંપર્ક કર્યો હતો. બગવદર પોલીસ મથકમાં આરોપી જીતેન્દ્ર સોલંકી વિરુદ્ધ પોક્સો એક્ટ સહિતની વિવિધ ગંભીર કલમો હેઠળ ગુનો દાખલ કરવામાં આવ્યો છે. પોલીસે ગુનો નોંધીને આરોપીની અટકાયત કરવા તેમજ આગળની કાયદાકીય કાર્યવાહી હાથ ધરી છે.
આ પણ વાંચો: Porbandar: બગવદર પંથકમાં સગીરા સાથે દુષ્કર્મ મામલે સગા ભાઈ સામે ફરિયાદ
