સુરેન્દ્રનગર જિલ્લાના થાનગઢ વિસ્તારમાં ગેરકાયદે ખનીજ અને કોલસા ચોરીની પ્રવૃત્તિઓ સામે સ્થાનિક પોલીસ દ્વારા સઘન અભિયાન હાથ ધરવામાં આવ્યું છે. થાનગઢ પોલીસને મળેલી ચોક્કસ બાતમીના આધારે વેલાળા અને જામવાળી ગામની સીમમાં આકસ્મિક દરોડા પાડવામાં આવ્યા હતા. આ દરોડા દરમિયાન કરોડો રૂપિયાની કિંમતનું ગેરકાયદે કાર્બોસેલ કોલસાનું ખનન ઝડપાઈ જતાં ખનિજ માફિયાઓમાં ભારે હડકંપ મચી ગયો છે.
વેલાળા અને જામવાળી સીમમાંથી કુલ 500 ટન કોલસો ઝડપાયો
પોલીસની ટીમે કરેલી તપાસ મુજબ, વેલાળા ગામની સીમમાંથી 1 ટ્રેક્ટર, 6 લોખંડના પાઇપ અને 100 મેટ્રિક ટન ગેરકાયદે કોલસો મળી આવ્યો હતો, જેની કુલ કિંમત રૂપિયા 8.10 લાખ આંકવામાં આવી છે. આ ઉપરાંત, જામવાળી ગામની સીમમાં હાથ ધરેલી તપાસમાં 17 લોખંડના પાઇપ, 7 ડીઝલ ચરખી અને 400 મેટ્રિક ટન કોલસો મળી આવ્યો હતો, જેની કિંમત રૂપિયા 17.65 લાખ થાય છે. આમ, પોલીસે બંને સ્થળો પરથી કુલ 500 મેટ્રિક ટન કોલસો અને અન્ય સાધનો સહિત કુલ રૂપિયા 25.75 લાખનો મુદ્દામાલ જપ્ત કર્યો છે.


