વલસાડ જિલ્લાના વાપીમાંથી ચોંકાવનારી ઘટના સામે આવી છે.આશરે 20 દિવસ અગાઉ રહસ્યમય સંજોગોમાં ગુમ થઈ ગયેલી એક યુવતીનો અત્યંત સડી ગયેલી અને ડીકમ્પોઝ્ડ હાલતમાં મૃતદેહ મળી આવ્યો છે.ઘટનાની જાણ થતાં જ પોલીસ કાફલો તાત્કાલિક ઘટનાસ્થળે દોડી ગયો હતો અને મામલાની ગંભીરતાને ધ્યાનમાં રાખીને સઘન તપાસ શરૂ કરી છે. વાપીના સેન્ટર પોઈન્ટ વિસ્તારમાં આવેલા બેઝમેન્ટ પાર્કિંગ પાસેથી મૃતદેહ મળતા ચકચાર મચી જવા પામી છે.
ગુમ થયેલી યુવતીનો મૃતદેહ 20 દિવસ બાદ મળ્યો
પ્રાપ્ત વિગતો અનુસાર,વાપીના સરસ્વતી નગર વિસ્તારમાં રહેતી મનીષા મોર્યા નામની યુવતી 20 દિવસ પૂર્વે ભેદી સંજોગોમાં ગુમ થઈ ગઈ હતી.યુવતી અચાનક ઘર છોડીને ક્યાંક ચાલી જવાથી અથવા રહસ્યમય રીતે ગાયબ થઈ જવાથી પરિવારજનો ચિંતામાં મુકાયા હતા.દીકરીની કોઈ ભાળ ન મળતા પરિવારજનો અને સગા-સંબંધીઓ ભારે ચિંતામાં જોવા મળ્યા હતાં.પરિવારે પોતાની દીકરીને શોધવા માટે વાપી તેમજ આસપાસના અનેક વિસ્તારોમાં ભારે દોડધામ આદરી હતી પરંતુ તે સમયે યુવતીનો કોઈ જ પત્તો લાગ્યો ન હતો.આ શોધખોળ બાદ આખરે 20 દિવસ વીતી ગયા પછી જ્યારે વાપીના સેન્ટર પોઈન્ટના બેઝમેન્ટ પાર્કિંગ પાસેથી મનીષાની બોડી અત્યંત ખરાબ અને ડીકમ્પોઝ્ડ હાલતમાં મળી આવી ત્યારે પોલીસ પણ ચોંકી ઉઠી હતી.