દાહોદ જિલ્લામાં દારૂબંધીના કડક અમલીકરણના ભાગરૂપે લીમખેડા પોલીસ સ્ટેશનની ટીમે મોટી સફળતા મેળવી છે. રાજસ્થાન સરહદેથી લક્ઝ્યુરિયસ કારમાં દારૂની હેરાફેરી કરવાના કાળો કારોબારનો પોલીસે પર્દાફાશ કર્યો છે. લીમખેડા પોલીસે ધાનપુર ચોકડી હાઇવે રોડ પર ચોક્કસ બાતમીના આધારે વોચ ગોઠવીને પસાર થઈ રહેલી એક સફેદ રંગની હ્યુન્ડાઇ ક્રેટા કારને અટકાવી તલાશી લેતાં તેમાંથી ગેરકાયદેસર વિદેશી દારૂનો જંગી જથ્થો મળી આવ્યો હતો.
ક્રેટા કારમાંથી 216 લીટર વિદેશી દારૂનો જથ્થો જપ્ત
પોલીસે કારની સઘન તપાસ કરતાં અંદર સંતાડેલી ભારતીય બનાવટના ઇંગ્લિશ દારૂની કુલ 1200 બોટલ (216 લીટર) મળી આવી હતી. પોલીસે સ્થળ પરથી વિદેશી દારૂનો જથ્થો, હ્યુન્ડાઇ ક્રેટા કાર તથા મોબાઇલ ફોન સહિત કુલ રૂપિયા 7,33,000નો મુદ્દામાલ જપ્ત કર્યો છે. દારૂની હેરાફેરી કરનાર બંને આરોપીઓ રાજસ્થાનના બાડમેર જિલ્લાના રહેવાસી હોવાનું પ્રાથમિક પૂછપરછમાં સામે આવ્યું છે.