દાહોદ જિલ્લાના લીમખેડા પંથકમાંથી સહકારી ક્ષેત્રને હચમચાવી મૂકનારો એક મોટો નાણાકીય કૌભાંડ અને ઉચાપતનો કેસ સામે આવ્યો છે. લીમખેડા તાલુકાના દૂધિયા ગામમાં કાર્યરત 'ધી ઉન્નતિ સેવિંગ્સ એન્ડ ક્રેડિટ કો-ઓપરેટિવ સોસાયટી'માં કરોડો રૂપિયાની હેરાફેરી થઈ હોવાનો પર્દાફાશ થયો છે. મંડળીના જવાબદાર હોદ્દેદારો અને કર્મચારીઓએ જ ગરીબ અને મધ્યમવર્ગીય સભાસદોના પરસેવાની કમાણીની થાપણો સેરવી લીધી હોવાની વિગતો બહાર આવતા સમગ્ર પંથકમાં ચકચાર મચી ગઈ છે.
બોગસ દસ્તાવેજો બનાવી કરોડો પચાવી પાડ્યા
ઓડિટ વર્ષ 2024-25 દરમિયાન જ્યારે મંડળીના હિસાબોની ઝીણવટભરી તપાસ કરવામાં આવી, ત્યારે આ કૌભાંડ સપાટી પર આવ્યું હતું. આરોપીઓએ મંડળીના રેકોર્ડમાં ભારે ગોબાચારી કરીને ખોટા દસ્તાવેજો અને બોગસ બેંક સ્ટેટમેન્ટ ઊભા કર્યા હતા. આ નકલી કાગળોના આધારે આરોપીઓએ સભાસદોની જાણ બહાર કુલ રૂપિયા 1.33 કરોડથી વધુની માતબર રકમની ઉચાપત કરી નાખી હતી. આ જંગી રકમ આરોપીઓએ મંડળીના હિતમાં વાપરવાને બદલે પોતાના અંગત મોજશોખ અને ઉપયોગમાં લઈ મંડળીને મોટું આર્થિક નુકસાન પહોંચાડ્યું હતું.
