અમદાવાદ ગ્રામ્યના ધોળકા તાલુકામાં આવેલા ભેટાવાડા ગામે ખેડૂતો અને ગ્રામજનોનું આંદોલન આજે સતત 36મા દિવસે પણ યથાવત રહ્યું છે. પોતાની વ્યાજબી માગણીઓને લઈને છેલ્લા બે દિવસથી ગ્રામજનો દ્વારા ધોળકા પ્રાંત કચેરીનો ઘેરાવ કરવામાં આવ્યો હતો. સ્થાનિક ખેડૂતોની સ્પષ્ટ માગ હતી કે પ્રાંત અધિકારી તેમને લેખિતમાં કામ પૂર્ણ કરવાની બાંહેધરી આપે, જેને લઈને ઘર્ષણની સ્થિતિ સર્જાઈ હતી.

પ્રાંત અધિકારીએ ખાતરી આપતાં આંદોલન સ્થગિત

પ્રથમ દિવસે પ્રાંત અધિકારી દ્વારા લેખિતમાં ખાતરી આપવાનો ઇનકાર કરવામાં આવ્યો હતો, જેના કારણે ખેડૂતોનો આક્રોશ બેવડાયો હતો. જોકે, બીજા દિવસે વહીવટી તંત્ર નમતું જોખીને પ્રાંત અધિકારીએ ખેડૂતોને લેખિતમાં કામ પૂર્ણ કરવાની ખાતરી આપી હતી. પ્રાંત અધિકારી પાસેથી લેખિત બાંહેધરી મળતાં જ ગઈકાલે મોડી રાત્રે ખેડૂતોએ ધોળકા પ્રાંત કચેરી ખાતે ચાલી રહેલું આંદોલન સ્થગિત કરવાનો નિર્ણય લીધો હતો, પરંતુ ભેટાવાડા ગામે આંદોલન યથાવત રાખવામાં આવ્યું છે.

ધારાસભ્યના ઘરે ઉગ્ર વિરોધની આકરી ચીમકી

ખેડૂતોની માગણી એ છે કે ભેટાવાડા પાસે જે માટીનો પાળો બનાવવામાં આવ્યો છે તેની જગ્યાએ કાયમી RCCની મજબૂત દિવાલ બનાવવામાં આવે અને કંપનીઓનું પ્રદૂષિત પાણી ગામમાં આવતું અટકાવવામાં આવે. ખેડૂતોએ સ્થાનિક ધારાસભ્ય કિરીટસિંહ ડાભીને અલ્ટીમેટમ આપતાં જણાવ્યું છે કે આગામી 10 દિવસમાં RCC દીવાલનું કામ શરૂ કરવામાં આવે. જો આ કામ કરવામાં નહીં આવે, તો 11મા દિવસે તમામ ખેડૂતો ધારાસભ્યના ઘરે પહોંચીને ઉગ્ર આંદોલન કરશે. ગ્રામજનોએ સ્પષ્ટ કહી દીધું છે કે જ્યાં સુધી સંપૂર્ણ કામ પૂરું નહીં થાય ત્યાં સુધી તેમનો લડાયક વિરોધ ચાલુ જ રહેશે.

ગુજરાતના વધુ સમાચાર વાંચવા માટે ક્લિક કરો