અમદાવાદ જિલ્લાના ધોળકા તાલુકામાં આવેલા ભેટવાડા ગામે ભારે વરસાદના કારણે ચારેય તરફ પાણી ભરાઈ જતાં સંપર્ક વિહોણી સ્થિતિ સર્જાઈ હતી. આ જળબંબાકાર વચ્ચે ગામના ૨૪ વર્ષીય સગર્ભા મહિલા હેતલબેન મકવાણાને અચાનક ઉપડેલી તીવ્ર પ્રસવ પીડાના કારણે પરિવારજનો મુશ્કેલીમાં મુકાયા હતા. રાત્રિના સમયે પરિસ્થિતિ કટોકટીપૂર્ણ બનતાં પરિવારે તુરંત 108 ઈમરજન્સી સેવા તેમજ સ્થાનિક વહીવટી તંત્રનો સંપર્ક કર્યો હતો.
પાણી ભરાતાં એમ્બ્યુલન્સ અટકાઈ, NDRFએ 2 બોટ સાથે મોરચો સંભાળ્યો
ગામમાં પાણી ભરાયેલા હોવાના કારણે 108 એમ્બ્યુલન્સ સીધી રીતે દર્દીના ઘર સુધી પહોંચી શકે તેમ નહોતી. ઘટનાની ગંભીરતા સમજી ધોળકા મામલતદાર ટીમ, 108ની ટીમ અને NDRFની ટુકડી ત્વરિત હરકતમાં આવી હતી. NDRFના જવાનો 2 બોટ લઈને જોખમી પરિસ્થિતિ વચ્ચે ગામના ઊંડા પાણીમાં ઉતર્યા હતા. તેમણે અત્યંત કાળજીપૂર્વક હેતલબેનને બોટમાં બેસાડીને સલામત રીતે પૂરના પાણીમાંથી બહાર કાઢી એમ્બ્યુલન્સ સુધી પહોંચાડ્યા હતા.