બનાસકાંઠા જિલ્લાના પાલનપુર ખાતે રાજ્યકક્ષાના વાહન વ્યવહાર મંત્રી પ્રવિણ માળીએ દિવાળીના પાવન પર્વ નિમિત્તે એક પ્રેરણાદાયક પહેલ કરી છે. તહેવારોના દિવસોમાં પણ પોતાના પરિવારથી દૂર રહીને જનતાની સેવા માટે ફરજ બજાવતા એસટી વિભાગના કર્મચારીઓનો ઉત્સાહ વધારવા માટે મંત્રી પાલનપુર એસટી વર્કશોપ ખાતે પહોંચ્યા હતા અને તેમની સાથે દીપોત્સવની ઉજવણી કરી હતી.
ડ્રાઇવર અને કંડક્ટર સાથે આત્મીય સંવાદ
પાલનપુર એસટી વર્કશોપ ખાતે મંત્રી પ્રવિણ માળીએ ઉપસ્થિત રહેલા તમામ એસટી બસ ડ્રાઇવરો અને કંડક્ટરો સાથે આત્મીયતાથી વાતચીત કરી હતી. તહેવારની રજાઓમાં પણ મુસાફરોની સુવિધા માટે રાઉન્ડ ધ ક્લોક સેવા આપતા કર્મચારીઓની કામગીરીને મંત્રીએ બિરદાવી હતી અને તેમની મુશ્કેલીઓ તેમજ કામકાજ અંગે પૂછપરછ કરી હતી.
