ભાટિયા ગામની મુખ્ય બજારમાં આવેલી એક સોની વેપારીની દુકાને રોજની જેમ વેપાર ચાલી રહ્યો હતો. આ દરમિયાન મોડી સાંજના સમયે એક વેલ-ડ્રેસ્ડ અજાણ્યો યુવાન ગ્રાહક હોવાનો ડોળ કરીને દુકાનમાં પ્રવેશ્યો હતો. તેણે વેપારી પાસે લગ્ન કે સામાજિક પ્રસંગ માટે સોનાના ચેન જોવાની ઈચ્છા વ્યક્ત કરી હતી.
વેપારીની સહેજ નજર ચૂકી અને ખેલ ખતમ
સોની વેપારીએ ગ્રાહક સમજીને સોનાના અસલી દાગીનાના બોક્સ બહાર કાઢ્યા હતા. ગઠિયાએ સોનાના બે ભારેભરખમ ચેન (જેનું વજન આશરે પોણા ત્રણ તોલા હતું) પસંદ કર્યા હતા. આ દરમિયાન વેપારી બિલ બનાવવાની કે અન્ય કોઈ દાગીના બતાવવાની ગણતરીમાં હતો અને તેની નજર સહેજ ચૂક થઈ હતી. બસ, આ જ સેકન્ડનો લાભ ઉઠાવીને અજાણ્યો યુવક 4,31,000 ની કિંમતના બંને સોનાના ચેન લઈને આંખના પલકારામાં દુકાનની બહાર દોડીને રફુચક્કર થઈ ગયો હતો. વેપારી કશું સમજે અને બૂમાબૂમ કરે તે પહેલાં જ ગઠિયો નજરથી દૂર થઈ ચૂક્યો હતો.
