દેવભૂમિ દ્વારકા જિલ્લાના જામ ખંભાળિયા તાલુકાના સલાયા શહેરમાંથી રખડતા પશુઓના આતંકની એક ચોંકાવનારી ઘટના સામે આવી છે. સલાયાના મુખ્ય અને વ્યસ્ત એવા શાક માર્કેટ વિસ્તારમાં અચાનક એકસાથે ત્રણ આખલાઓ વચ્ચે જબ્બર યુદ્ધ જામ્યું હતું. ધોળા દિવસે જાહેર માર્ગ પર આખલાઓ પરસ્પર આક્રમક રીતે લડવા લાગતાં આસપાસના ખરીદદારો અને રાહદારીઓમાં ભારે અફરાતફરી મચી ગઈ હતી. આખલાઓની લડાઈ એટલી ભયાનક હતી કે પોતાનો જીવ બચાવવા માટે લોકોએ આમતેમ નાસભાગ કરવી પડી હતી.
આખલાઓનું રૌદ્ર સ્વરૂપ જોઈ લોકો ભયભીત
સ્થાનિક સૂત્રો પાસેથી મળતી માહિતી મુજબ, શાક માર્કેટના મુખ્ય રોડ પર જ્યારે આ ત્રણેય આખલાઓ એકબીજા સાથે શીંગડા ભરાવીને આડેધડ લડી રહ્યા હતા, ત્યારે તેમનું રૌદ્ર સ્વરૂપ જોઈને આસપાસના દુકાનદારો અને સ્થાનિક રહીશો કંપારી ઊઠી ગયા હતા. આખલાઓ લડતા-લડતા લારીઓ અને દુકાનો તરફ ધસી આવતા મોટું નુકસાન થવાની ભીતિ સેવાઈ રહી હતી. આખલાઓને શાંત પાડવા અને છૂટા પાડવા માટે કેટલાક સ્થાનિક લોકોએ હિંમત બતાવીને તેમના પર બારીઓ અને ધાબા પરથી પાણીનો છંટકાવ પણ કર્યો હતો, છતાં પશુઓ લાંબો સમય સુધી લડતા રહ્યા હતા.
