ગીર જંગલ બોર્ડર નજીક આવેલા સણોસરી ગામમાંથી એક અત્યંત કરુણ અને કાળજું કંપાવી દેનારી ઘટના સામે આવી છે. રહેણાંક વિસ્તાર નજીક ધસી આવેલા એક ખૂંખાર દીપડાએ માત્ર ત્રણ વર્ષના માસૂમ બાળક પર જીવલેણ હુમલો કરી તેને ફાડી ખાધો છે. આ કમકમાટીભરી ઘટનાને પગલે સમગ્ર પંથકમાં ભારે અરેરાટી અને ભયનો માહોલ વ્યાપી ગયો છે.
રમતા બાળકને દીપડો ઉઠાવી ગયો
પ્રાપ્ત માહિતી અનુસાર, સણોસરી ગામમાં પરિવાર સાથે રહેતો ત્રણ વર્ષીય ચેતન બામણીયા અચાનક લાપતા બન્યો હતો. તપાસ કરતાં માલૂમ પડ્યું હતું કે સીમ વિસ્તારમાંથી ત્રાટકેલો દીપડો માસૂમ બાળકને ઉઠાવીને જંગલ તરફ ભાગી ગયો હતો.બનાવની ગંભીરતા જોતાં વન વિભાગની રેસ્ક્યૂ ટીમ તાબડતોબ ઘટનાસ્થળે દોડી આવી હતી અને સ્થાનિકોની મદદથી આસપાસના કોતર તથા ઝાડી-ઝાંખરાવાળા વિસ્તારમાં સઘન શોધખોળ શરૂ કરી હતી. કલાકોની જહેમત બાદ માસૂમ ચેતનનો મૃતદેહ અવાવરૂ જગ્યાએથી દીપડાએ અત્યંત ક્રૂરતાપૂર્વક ફાડી ખાધેલી હાલતમાં મળી આવતાં પરિવારજનોમાં હૈયાફાટ રુદન ફેલાઈ ગયું હતું. પંચનામા બાદ બાળકના મૃતદેહને પોસ્ટમોર્ટમ અર્થે ગીર ગઢડા સરકારી હોસ્પિટલ ખાતે ખસેડવામાં આવ્યો હતો.