ગીર સોમનાથ જિલ્લાના મુખ્ય મથક વેરાવળમાંથી એક અત્યંત ગંભીર અને ચિંતાજનક ઘટના સામે આવી છે. વેરાવળના વેરાવળ-જૂનાગઢ રોડ પર આવેલી ડૉ. ગોડસે હોસ્પિટલ નજીક આવેલા સ્ક્રેપના ગોડાઉનોમાં અચાનક ભીષણ આગ ફાટી નીકળી હતી. બપોરે સાડા ત્રણ વાગ્યાની આસપાસ બનેલી આ ઘટનાને કારણે આસપાસના વિસ્તારમાં ભારે અફરાતફરી અને નાસભાગ મચી ગઈ હતી.

સ્ક્રેપના બે ગોડાઉન આગની લપેટમાં, કાળા ડિબાંગ ધુમાડા ફેલાયા

પ્રાપ્ત વિગતો અનુસાર આગ એટલી બધી વિકરાળ હતી કે થોડી જ મિનિટોમાં તેણે આજુબાજુના સ્ક્રેપના બે મોટા ગોડાઉનોને પોતાની લપેટમાં લઈ લીધા હતા. ગોડાઉનમાં રહેલો ભંગાર અને જ્વલનશીલ સામગ્રીના કારણે આગની ઊંચી જ્વાળાઓ અને કાળા ડિબાંગ ધુમાડાના ગોટેગોટા દૂર-દૂર સુધી નજરે પડતા લોકોમાં ગભરાટ ફેલાઈ ગયો હતો.

7 ફાયર ફાઈટરની ટીમ દ્વારા સતત પાણીનો મારો ચલાવાયો

ઘટનાની ગંભીરતાને ધ્યાનમાં રાખીને તુરંત જ તંત્ર દ્વારા કાર્યવાહી કરવામાં આવી હતી. વેરાવળ ફાયર ફાઈટરની ટીમ તાત્કાલિક ઘટનાસ્થળે દોડી ગઈ હતી. આગની વિકરાળતાને જોતા કુલ 7 જેટલા ફાયર ફાઈટરો કામે લગાડવામાં આવ્યા હતા અને ચારેય બાજુથી પાણીનો સતત મારો ચલાવીને આગ પર કાબૂ મેળવવાની સઘન કામગીરી હાથ ધરવામાં આવી હતી. સદનસીબે આ ભીષણ આગમાં સમયસર ફાયર ટીમ પહોંચી જવાથી મોટી હોનારત ટળી હતી.

ગુજરાતના વધુ સમાચાર વાંચવા માટે ક્લિક કરો