ગોંડલના ગુંદાળા રોડ પર આવેલી એક સોલ્વન્ટ ફેક્ટરીમાં કામકાજ દરમિયાન અચાનક સર્જાયેલા શોર્ટ સર્કિટને કારણે એક અત્યંત હૃદયદ્રાવક અને કમકમાટીભરી દુર્ઘટના સામે આવી છે. આ ગંભીર અકસ્માતમાં એક વૃદ્ધ ઓપરેટરનું વીજ કરંટ લાગવાને કારણે ઘટનાસ્થળે જ કરુણ મોત નીપજ્યું હતું. આ અકસ્માત એટલો આઘાતજનક હતો કે મૃતકના પુત્રએ પોતાની નજર સામે જ પિતાને દમ તોડતા જોયા હતા, જેને પગલે સમગ્ર પંથકમાં અરેરાટી સાથે ભારે શોક વ્યાપી ગયો છે.
બંધ ફેક્ટરીમાં કામ દરમિયાન લાગ્યો વીજ કરંટ
ગોંડલના ગુંદાળા રોડ પર સ્થિત 'ખેડૂત સોલ્વન્ટ પ્રા. લી.' ફેક્ટરીના રિફાઇનરી વિભાગમાં આ ઘટના બની હતી. મૂળ ધોરાજીના વતની અને હાલ ફેક્ટરી ક્વાર્ટર્સમાં જ રહેતા 75 વર્ષીય વૃદ્ધ પ્રેમજીભાઈ નાથાભાઇ બગડા અહીં ઓપરેટર તરીકે ફરજ બજાવતા હતા. ઘટનાના દિવસે બોઈલરમાં કોઈ તકનીકી ખામી સર્જાવાને કારણે ફેક્ટરીનું મુખ્ય ઉત્પાદન બંધ હતું. આ દરમિયાન કર્મચારીઓ પરચુરણ કામકાજ કરી રહ્યા હતા, ત્યારે બીજા માળે આવેલા ઈલેક્ટ્રિક પેનલ બોર્ડ પાસે પ્રેમજીભાઈને અચાનક હાઈ-વોલ્ટેજ શોર્ટ લાગ્યો હતો.