સાબરકાંઠા જિલ્લાના હિંમતનગર નજીક અને દેરોલ પાસે આવેલો હિરણપુરા બેરેજ ચોમાસાના ભારે વરસાદને પગલે છલકાઈ ગયો છે. ઉપરવાસમાં પડેલા ધોધમાર વરસાદના કારણે જળાશયમાં પાણીની પુષ્કળ આવક થઈ રહી છે. તાજેતરના અહેવાલો મુજબ, હિરણપુરા બેરેજમાં 900 ક્યુસેક પાણીની આવક નોંધાઈ હતી, જેમાં વધુ 1000 ક્યુસેક પાણીનો ઉમેરો થતાં જળસ્તરમાં સતત વધારો થઈ રહ્યો છે.
તંત્ર દ્વારા સાવચેતીની એડવાઈઝરી
જળાશયમાં પાણીની સપાટી વધી રહી હોવાથી સાબરકાંઠા અને પડોશી મહેસાણા જિલ્લાના આઠ જેટલા નીચાણવાળા ગામોને એલર્ટ કરી દેવામાં આવ્યા છે. તંત્ર દ્વારા સાબરમતી નદીના કિનારે આવેલા વિસ્તારોમાં રહેતા લોકોને સાવચેત રહેવાની ખાસ સૂચના આપવામાં આવી છે. નદી કિનારે પશુ ચરાવવા જવા, માછીમારી કરવા તેમજ ખનીજ વહન કે બિનજરૂરી અવરજવર ન કરવા માટે વહીવટી તંત્ર દ્વારા નાગરિકોને આગ્રહભરી અપીલ કરવામાં આવી છે.