સાબરકાંઠા જિલ્લાના વડાલી પંથકમાં આગ લાગવાની એક મોટી અને ચકચારી ઘટના સામે આવી છે. વડાલીના જીઈબી માર્ગ પર આવેલા પ્રસિદ્ધ દૂધેશ્વર મહાદેવ મંદિરની બરાબર સામેની ખુલ્લી જગ્યામાં વસવાટ કરતા એક શ્રમિક પરિવારના ઝુંપડામાં અચાનક ભીષણ આગ ફાટી નીકળી હતી. જોતજોતામાં આગે વિકરાળ સ્વરૂપ ધારણ કરી લેતા સમગ્ર વિસ્તારમાં ભારે અફરાતફરી અને દોડધામ મચી ગઈ હતી.
મોટરસાયકલ અને ઘરવખરીનો તમામ સામાન બળીને ખાખ
આ ભીષણ આગની લપેટમાં આવી જવાથી શ્રમિક પરિવારની જીવનભરની કમાણી સમાન ઘરવખરીનો તમામ સામાન બળીને રાખ થઈ ગયો છે. ઝુંપડાની અંદર પાર્ક કરવામાં આવેલી 1 મોટરસાયકલ, અનાજનો જથ્થો, કપડાં અને અન્ય જરૂરી ચીજવસ્તુઓ આગમાં સંપૂર્ણપણે ખાખ થઈ જતાં ગરીબ પરિવાર પર આભ તૂટી પડ્યું છે. આગ એટલી પ્રચંડ હતી કે, આકાશમાં દૂર-દૂર સુધી કાળા ધુમાડાના ગોટે-ગોટા ઉડતા જોવા મળ્યા હતા, જેના કારણે આસપાસના રહીશોમાં પણ ભયનો માહોલ ફેલાયો હતો.
પરિવાર બહાર હોવાથી મોટી જાનહાનિ ટળી
સદનસીબે, જે સમયે ઝુંપડામાં આગ ભભૂકી ઉઠી તે સમયે શ્રમિક પરિવારના સભ્યો ઝુંપડાની બહાર હતા. પરિવારની સમયસૂચકતા અને બહાર હાજરી હોવાને કારણે આ દુર્ઘટનામાં કોઈ પણ વ્યક્તિ દાઝ્યું નથી અને એક મોટી જાનહાનિ ટળી છે. જોકે, આર્થિક રીતે પાયમાલ થઈ ગયેલા પરિવારની હાલત અત્યંત કફોડી બની છે.

ફાયર બ્રિગેડે પાણીનો મારો ચલાવી આગ પર કાબુ મેળવ્યો
આગ લાગવાની જાણ થતાં જ આસપાસના સ્થાનિક લોકો તાત્કાલિક મદદ માટે દોડી આવ્યા હતા અને વડાલી ફાયર બ્રિગેડની ટીમને જાણ કરવામાં આવી હતી. ઘટનાની ગંભીરતાને ધ્યાનમાં રાખીને ફાયર ફાઈટરોની ટીમ તાત્કાલિક ઘટના સ્થળે પહોંચી ગઈ હતી.
ફાયર બ્રિગેડના જવાનોએ સતત પાણીનો મારો ચલાવી ભારે જહેમત બાદ આગ પર સંપૂર્ણ કાબુ મેળવી લીધો હતો, જેનાથી આગ આસપાસના અન્ય વિસ્તારોમાં પ્રસરતી અટકી હતી. હાલ આ ઝુંપડામાં આગ કયા કારણોસર લાગી તે અંગેનું ચોક્કસ કારણ હજુ સુધી અકબંધ છે, જે અંગે સ્થાનિક તંત્ર દ્વારા વધુ તપાસ હાથ ધરવામાં આવી છે.
આ પણ વાંચો: Sabarkantha News: સાબરડેરીમાં પશુદાણ ખરીદી અને દૂધની ગુણવત્તા મુદ્દે તપાસની માંગ, કલેક્ટરને આવેદનપત્ર અપાયું