ઈડર શહેરમાં આવેલા રાણી તળાવ ખાતે એક અત્યંત કરૂણ ઘટના સામે આવી છે. ઈડરના 4 યુવાનો રાણી તળાવમાં નાહવા માટે પડ્યા હતા. તળાવમાં નાહતી વખતે યુવાનો અચાનક ઊંડા પાણી અને ખાડા તરફ સરકી જતાં ડૂબવા લાગ્યા હતા અને બૂમાબૂમ કરી મૂકી હતી.
ઈડરના રાણી તળાવમાં મોટી દુર્ઘટના
આસપાસમાં હાજર સ્થાનિક નાગરિકોનું ધ્યાન જતાં તેઓ ત્વરિત મદદે દોડી આવ્યા હતા. સ્થાનિકોએ સમયસૂચકતા અને હિંમત દાખવીને તળાવમાં ડૂબી રહેલા 4 યુવાનો પૈકી 3 યુવાનોને સલામત રીતે બહાર ખેંચી કાઢ્યા હતા. જોકે, 1 યુવક તળાવના ઊંડા પાણીના ખાડામાં ગરકાવ થઈ જતાં તેનો કોઈ પત્તો લાગ્યો નહોતો.ઘટનાની જાણ થતાં જ ઈડર ફાયર બ્રિગેડની ટીમ અને ઈડર પોલીસ સ્ટેશનનો કાફલો તાત્કાલિક રાણી તળાવ ખાતે પહોંચી ગયો હતો. ફાયર વિભાગના તરવૈયાઓએ તળાવના ઊંડા પાણીમાં ડૂબેલા યુવકની શોધખોળ હાથ ધરી છે.