જામનગર એલસીબી (LCB) પોલીસે દારૂની હેરાફેરી સામે મોટો પ્રહાર કર્યો છે. જામનગર-લાલપુર હાઇવે પરથી પસાર થઈ રહેલા એક શંકાસ્પદ પેસેન્જર ટેમ્પોને આંતરીને પોલીસે તલાશી લીધી હતી. આ તલાશી દરમિયાન વાહનની અંદર બનાવવામાં આવેલા ગુપ્ત ચોરખાનામાંથી ભારતીય બનાવટના વિદેશી દારૂના 2,065 અડધિયા(ચપલા)નો મોટો જથ્થો મળી આવ્યો હતો. પોલીસે વિદેશી દારૂ અને ટેમ્પો કાર સહિત કુલ રૂપિયા 10 લાખનો મુદ્દામાલ કબ્જે કરીને દરેડ ગામના રહેવાસી વિજયસિંહ બહાદુરસિંહ જાડેજા નામના શખ્સને સ્થળ પરથી જ દબોચી લીધો હતો.
પેસેન્જર વાહનમાં ચાલતું હતું ગેરકાયદે નેટવર્ક
બુટલેગરો દ્વારા પોલીસને ચકમો આપવા માટે પેસેન્જર વાહનની આડમાં દારૂની હેરાફેરી કરવાનો નવો કીમિયો અપનાવવામાં આવ્યો હતો. વાહનમાં એવી રીતે ખાસ ચોરખાનું બનાવવામાં આવ્યું હતું કે પ્રથમ નજરે કોઈને પણ દારૂનો જથ્થો હોવાની આશંકા ન જાય. પરંતુ જામનગર એલસીબીની ટીમે ઝીણવટભરી તપાસ કરીને આ ગુપ્ત ખાનામાંથી દારૂનો વિશાળ જથ્થો શોધી કાઢ્યો હતો. પોલીસે દારૂની બોટલો અને વાહન જપ્ત કરીને આરોપી સામે દારૂબંધી ધારા (પ્રોહિબિશન એક્ટ) મુજબ ગુનો નોંધી આગળની કાયદેસરની કાર્યવાહી હાથ ધરી છે.