જામનગર શહેરમાંથી એક દુઃખદ સમાચાર સામે આવ્યા છે. શહેરના ગીતામંદિર પાસે આવેલી મહાવીર સોસાયટીમાં એક જર્જરિત મકાનનું બાંધકામ તોડવાની કામગીરી ચાલી રહી હતી. આ દરમિયાન અચાનક મકાનની દીવાલ ધરાશાયી થઈને તૂટી પડતા ત્યાં કામ કરી રહેલા મજૂરો અકસ્માતનો ભોગ બન્યા હતા. અચાનક દીવાલ પડવાથી ભારે અફરાતફરી મચી ગઈ હતી અને શ્રમિકો કાટમાળ નીચે દબાઈ ગયા હતા.
ત્રણ મજૂરો ઘાયલ, સારવાર દરમિયાન સુનિલભાઈનું કરુણ મોત
આ ગંભીર દુર્ઘટનામાં સુનિલભાઈ, કારૂભાઈ અને જતીનભાઈ નામના ત્રણ મજૂરો ગંભીર રીતે ઘાયલ થયા હતા. તાત્કાલિક તમામ ઇજાગ્રસ્તોને સારવાર અર્થે શહેરની જી.જી. હોસ્પિટલ (GG Hospital) ખસેડવામાં આવ્યા હતા. હોસ્પિટલમાં સારવાર દરમિયાન સુનિલભાઈ નામના શ્રમિકનું ગંભીર ઇજાઓને કારણે કરુણ મોત નીપજ્યું હતું, જ્યારે અન્ય બે ઘાયલ મજૂરો કારૂભાઈ અને જતીનભાઈની હાલ હોસ્પિટલમાં સારવાર ચાલી રહી છે.