દિવાળીના આનંદ અને રોશનીના પર્વ વચ્ચે જામનગર શહેરમાંથી એક ચિંતાજનક ઘટના સામે આવી છે. જામનગર શહેરના નંદનવન પાર્ક વિસ્તારમાં આવેલા એક ખુલ્લા પ્લોટ અને ભંગારના વાડામાં અચાનક ભીષણ આગ ફાટી નીકળી હતી. તહેવારના દિવસે જ અચાનક આગ ભભૂકી ઉઠતા આસપાસના રહેણાક વિસ્તાર અને લોકોમાં ભારે અફરાતફરી અને ગભરાટનો માહોલ સર્જાઈ ગયો હતો.

ભંગારના વાડામાં આગ ફેલાતા આસપાસના લોકોમાં દોડધામ

પ્રાપ્ત વિગતો અનુસાર, નંદનવન પાર્ક વિસ્તારમાં આવેલા ભંગારના વાડામાં કોઈ કારણોસર આગ લાગી હતી. ભંગારનો જથ્થો હોવાને કારણે આગે ઝડપથી ઉગ્ર સ્વરૂપ ધારણ કરી લીધું હતું અને આકાશમાં ધુમાડાના ગોટેગોટા છવાઈ ગયા હતા. આગ આસપાસના વિસ્તારમાં ફેલાઈ ન જાય તે માટે સ્થાનિક લોકો પણ ચિંતામાં મુકાયા હતા અને તાત્કાલિક ફાયર વિભાગને જાણ કરવામાં આવી હતી.

ફાયર બ્રિગેડની સમયસૂચકતાથી મોટી હોનારત ટળી

ઘટનાની જાણ થતા જ જામનગર ફાયર બ્રિગેડની ટીમ ટાપુઓ અને ગાડીઓ સાથે તાત્કાલિક ઘટનાસ્થળે દોડી ગઈ હતી. ફાયર જવાનોએ ભારે જહેમત ઉઠાવીને ચારેય બાજુથી પાણીનો મારો ચલાવીને આગ પર સફળતાપૂર્વક કાબૂ મેળવ્યો હતો. ફાયર ટીમ સમયસર પહોંચી જવાથી આગ વધુ વ્યાપક બનતી અટકાવી શકાઈ હતી અને સમયસૂચકતાના કારણે એક મોટી દુર્ઘટના ટળી ગઈ હતી, જેને લઈને તંત્ર અને સ્થાનિકોએ રાહતનો શ્વાસ લીધો હતો.

ગુજરાતના વધુ સમાચાર વાંચવા માટે ક્લિક કરો