રાજકોટ અને જૂનાગઢને જોડતા મુખ્ય હાઈવે પર અકસ્માતોની સંખ્યામાં સતત વધારો થઈ રહ્યો છે, ત્યારે વધુ એક ગમખ્વાર અકસ્માતની ઘટના સામે આવી છે. જેતપુર-જૂનાગઢ હાઈવે પર આવેલા જેતલસર નજીક ગલગલીયા ધાબા પાસે રસ્તા વચ્ચે અચાનક એક આખલો આડો ઉતરી ગયો હતો. હાઈવે પર પશુ અચાનક આવી જવાના કારણે પૂરઝડપે જઈ રહેલા વાહનચાલકો માટે પરિસ્થિતિ અસંતુલિત બની ગઈ હતી.
એક્ટિવા સવાર બે યુવાનો અકસ્માતનો ભોગ બન્યા
એક્ટિવા વાહન પર સવાર બે યુવાનો રાજકોટ તરફથી જૂનાગઢ તરફ જઈ રહ્યા હતા. આ દરમિયાન જેતલસર નજીક અચાનક રોડ પર આખલો આવી જતાં તેમનું એક્ટિવા બેકાબૂ બન્યું હતું અને ગંભીર અકસ્માત સર્જાયો હતો. આ અકસ્માતમાં એક્ટિવા સવાર બે પૈકી 18 વર્ષીય યુવાન શકલેન આદમાણીનું ઘટનાસ્થળે જ કે ટૂંકી સારવાર દરમિયાન કરુણ મોત નીપજ્યું હતું, જ્યારે અન્ય એક યુવાન ગંભીર રીતે ઈજાગ્રસ્ત થયો હતો.