જૂનાગઢ શહેરના ખામધ્રોળ રોડ વિસ્તારમાંથી એક અત્યંત હૃદયદ્રાવક અને કમનસીબ અકસ્માતના સમાચાર સામે આવ્યા છે. અહીં આવેલા એક ગામમાં જૂનું મકાન તોડ્યા બાદ ત્યાં ભંગાર એકઠો કરવાનું અને તોડવાનું કામ ચાલી રહ્યું હતું. આ ભંગારનું કામ રાખનારા એક વયોવૃદ્ધ શ્રમિક ત્યાં પોતાની રોજીરોટી માટે કામ કરી રહ્યા હતા. આ દરમિયાન અચાનક તેમનો પગ લપસી ગયો હતો અને એક ઊંડા કૂવામાં સીધા ખાબક્યા હતા.
ભંગાર તોડતા સમયે વૃદ્ધ કૂવામાં પડતા મોત
કૂવામાં અચાનક ખાબકેલા આ વૃદ્ધની ઓળખ 65 વર્ષીય કાસમભાઇ અલીભાઈ ઠેબા તરીકે થઈ છે. કૂવામાં પાણી હોવાના કારણે અને મોટી ઉંમર હોવાને લીધે કાસમભાઇ બહાર નીકળી શક્યા ન હતા અને જોતજોતામાં પાણીમાં ગરકાવ થઈ ગયા હતા. ઘટનાને પગલે આસપાસના અન્ય શ્રમિકો અને સ્થાનિક રહીશો તાત્કાલિક કૂવા પાસે દોડી આવ્યા હતા. વૃદ્ધ કાસમભાઇના અકાળ અવસાનના સમાચાર મળતા જ તેમના પરિવાર પર આભ તૂટી પડ્યું છે અને પરિવારજનોના આક્રંદથી વાતાવરણ ગમગીન બન્યું છે.