ગુજરાતમાં સિંહની પજવણીના અનેક કિસ્સા સામે આવી રહ્યાં છે. ગેરકાયદે સિંહ દર્શન અંગેના પણ વીડિયો વાયરલ થઈ રહ્યાં છે. ત્યારે હવે જૂનાગઢમાં સક્કરબાગ ઝૂમાં વન્ય જીવોની પજવણીનો વીડિયો વાયરલ થયો છે. વાઘના પાંજરામાં કપડું નાંખીને પજવણી કરતો વીડિયો વાયરલ થયો છે. વન્ય જીવોની સુરક્ષાને લઈને તંત્ર સામે ગંભીર સવાલો ઉભા થયાં છે. સુરક્ષા તંત્રએ વાયરલ વીડિયોના આધારે તપાસનો ધમધમાટ શરૂ કર્યો હતો અને વાઘની પજવણી કરનારા બે શખ્સોને ઝડપી પાડી કાર્યવાહી હાથ ધરાઈ છે.
રાજકોટના બે શખ્સોને તંત્ર દ્વારા ઝડપી લેવાયા
જૂનાગઢના સક્કરબાગ ઝૂમાં કપડૂ નાંખીને વાઘની પજવણી કરનારા બે શખ્સોને ઝડપી લેવામાં આવ્યા છે. રાજકોટના બોડી ઘોડીના શખ્સોની આ પજવણીમાં સંડોવણી હોવાનું સામે આવ્યું છે. દેવાભાઈ અને બાબુલાલ શિરોડીયાની ધરપકડ કરવામાં આવી છે. સક્કરબાગ ઝૂની ટીમે સીસીટીવી અને વાયરલ વીડિયોના આધારે તપાસ હાથ ધરી બે શખ્સોને ઝડપી પાડ્યા છે. જૂનાગઢના સક્કરબાગ ઝૂમાં વન્યજીવોની સુરક્ષા અને તંત્રની બેદરકારી દર્શાવતો એક ચોંકાવનારો વીડિયો સોશિયલ મીડિયા પર વાયરલ થયો હતો.