ખેડા જિલ્લાના મહુધા તાલુકાના અલીણા ગામે જમીન સંબંધી જૂના વિવાદને પગલે કાયદો અને વ્યવસ્થાની સ્થિતિ વણસી હોવાનો ગંભીર બનાવ સામે આવ્યો છે. ગામમાં એક જમીન મુદ્દે ચાલી રહેલી તકરારમાં અચાનક ઉશ્કેરાયેલા આશરે 35થી 40 લોકોના મોટા ટોળાએ એક જ પરિવારના સભ્યો પર લાકડીઓ અને અન્ય હથિયારો વડે હિંસક હુમલો કરી દીધો હતો. ધોળા દિવસે બનેલી આ જૂથ અથડામણની ઘટનાને પગલે સમગ્ર પંથકમાં ભારે ચકચાર મચી ગઈ છે અને ગામમાં ચુસ્ત પોલીસ બંદોબસ્ત ગોઠવી દેવાયો છે.
હુમલામાં 6 લોકો ઈજાગ્રસ્ત, 3ની હાલત ગંભીર
આ આયોજિત હુમલા દરમિયાન ટોળાએ નિર્દયતાપૂર્વક માર મારતા ભોગ બનનાર પરિવારના મહિલા સહિત કુલ 6 સભ્યો ગંભીર રીતે ઈજાગ્રસ્ત થયા છે. ઘટનાને પગલે આસપાસના લોકો એકઠા થઈ જતાં હુમલાખોરો ત્યાંથી નાસી છૂટ્યા હતા. સ્થાનિકોની મદદથી તમામ ઈજાગ્રસ્તોને તાત્કાલિક સારવાર અર્થે ખસેડવામાં આવ્યા હતા, જ્યાં પ્રાથમિક તપાસ બાદ 3 લોકોને સામાન્ય ઈજા હોવાથી સ્થાનિક કક્ષાએ પ્રાથમિક સારવાર આપી રજા અપાઈ હતી. જ્યારે અન્ય 3 લોકોને શરીરે વધુ ગંભીર ઈજાઓ પહોંચી હોવાને કારણે વધુ સારવાર અર્થે નડિયાદની ખાનગી હોસ્પિટલમાં દાખલ કરવામાં આવ્યા છે.