ખેડા જિલ્લાની અત્યંત મહત્વની ગણાતી કપડવંજ ખેતીવાડી ઉત્પન્ન બજાર સમિતિ (APMC) ની બીજી ટર્મ માટે ચેરમેન અને વાઇસ ચેરમેનની ચૂંટણી પ્રક્રિયા આજે APMC ના હોલમાં યોજાઈ હતી. કપડવંજ APMC માં ભાજપની સ્પષ્ટ અને નિર્વિવાદ બહુમતી હોવાથી ચૂંટણી પ્રક્રિયા માત્ર ઔપચારિક બની રહી હતી.ભાજપ પ્રદેશ મોવડીમંડળ અને જિલ્લા ભાજપ સંગઠન દ્વારા નક્કી કરવામાં આવેલા નિયમ મુજબ ભાજપે સત્તાવાર મેન્ડેડ જાહેર કર્યું હતું.
ચેરમેન અને વાઇસ ચેરમેન પદે બિનહરીફ ચૂંટણી
ભાજપના મેન્ડેડ અનુસાર ચેરમેન પદ માટે નિલેશભાઈ મણીભાઈ પટેલ ના નામનો પ્રસ્તાવ મૂકવામાં આવ્યો હતો. જ્યારે વાઇસ ચેરમેન પદ માટે દિનેશભાઈ રેવાભાઇ પટેલ નું નામ રજૂ કરાયું હતું. અન્ય કોઈ ઉમેદવારી ફોર્મ ન આવતાં બંને હોદ્દેદારોને બિનહરીફ ચૂંટાયેલા જાહેર કરવામાં આવ્યા હતા.અહીં નોંધનીય છે કે નવનિયુક્ત ચેરમેન નિલેશભાઈ પટેલ અગાઉ પણ કપડવંજ APMC ના ચેરમેન તરીકે સફળતાપૂર્વક જવાબદારી સંભાળી ચૂક્યા છે, જ્યારે દિનેશભાઈ પટેલ આ વખતે પ્રથમ જ વાર ડિરેક્ટર તરીકે ચૂંટાઈ આવ્યા હતા અને પક્ષે તેમના પર વિશ્વાસ મૂકીને સીધા વાઇસ ચેરમેનનું મહત્વનું પદ સોંપ્યું છે.